DILI, STLTIMORLESTE.com – Komunidade iha kapital Dili kestiona sirkulasaun kareta karga todan ka tronton neebe kontinua halai iha tempu loron. Situasaun nee konsideira fo ameasa ba seguransa rodaviaria no aumenta liu tan engarrafamentu neebe daudaun nee sai ona problema kronik iha sidade laran.
Sidadaun ida husi area Komoro, Martinho dos Santos hatoo ninia laran todan ba STL katak, prezensa tronton iha tempu loron halo kbiit laek sira hanesan motorista, joven no labarik sira neebe ba eskola sente tauk.
“Ita haree tronton boot sira nee halai hanesan sira deit mak nain ba estrada, sira okupa espasu luan no dudu transporte kiik sira ba ninin. Ita nia Autoridade sira tenke foti medidade antes asidente grave akontese,” dehan Jose ba STL, Kuarta (04/03/2026).
Aleinde kestaun seguransa, komunidade nee mos kestiona impaktu husi karga todan neebe karreta tronton sira nee lori ba kualidade estrada. Povu barak sente katak estrada foun neebe governu harii sei lalais estraga, tanba simu todan sensivu iha tempu loron manas.
Engarrafamentu mos sai komplikadu liu tan, liu liu iha area sira hanesan Tasi Tolu, Komoro, Bekora no selu tan, neebe baibain sai pontu kritiku ba movimentu karreta tronton boot sira nee.
Tanba nee Martinho husu ba Diresaun Nasional Transporte Tereste (DNTT) no Polisia Tranzitu (PNTL) atu kria regulamentu rigprozu ba oras opresaun karreta tronton ka kaminiaun boot nian.
“Diak liu kareta Kaminiaun boot ka tronton sira nee halai deit iha tempu kalan, husi tuku 22:00 too dader tuku 05:00, ida nee mak pratika neebe sidade dezenvolvidu sira seluk uza,” hatete komunidade nee.
Iha parte seluk, motorista kaminiaun sira mos iha sira nia rajaun, Dementino motorista tronton ida neebe lori material konstrusaun hatete, sira kumpri deit orden husi kompanhia.
“Se ami la halai loron, ami nia salariu la lao. Projetu konstrusaun sira iha sidade laran hein material. Se hein kalan deit kustu transporte sei sae,” Dementino haktuir.
Entretantu tuir observasaun jornalista STL iha terrenu haree katak, kaminiaun ka tronton boot sira nee sirkula livremente ida dalan protokolu sira hanesan fali iha tempu kalan, maski iha oras servisu nian neebe movimentu transporte publiku no privadu sira nakonu tebes.
(car)
