DILI, STLTIMORLESTE.com – Komunidade iha teritoriu laran komesa kestiona fali kualidade konstrusaun estrada neebe implementa husi kompanhia lokal no internasional balu, maske governu liu husi Ministeiru Obras Publika (MOP) kontinua lansa projetu reabilitasaun estrada barak iha tinan 2026, realidade iha terenu hatudu katak, kualidade husi obra hirak nee seidauk kumpri kriteria teknika neebe diak.
Iha observasaun neebe halao husi komunidade sira katak estrada foun balu neebe foin remata iha fulan hirak liu ba komesa hatudu sinal nakfera no alkatraun komesa sai, kestaun nee mosu hanesan iha estrada Kasnafar neeba no area rural sira seluk neebe asesu ba bee drainajen la diak, rezulta bee udan rezulta bee udan tama ba estrada laran no estraga kualidade alkatraun.
“Ami agradese tanba governu hadia ona estrada sira, maibe ami triste tanba foin la tooo tinan deit estrada nakfera ona,se kontinua nunee tinan oin ita tenke hadia fali,” hatete reprezenta komunidade ida husi Aileu ho naran, Matus Goncaslves ba STL, iha Fomento, Dili, Segunda (23/02/2026).
Tanba nee sira husu ba governu liu husi Ministeriu Obras Publika atu husu responsabilidade ba kompanhia neebe halao servisu ladiak tenki obriga atu hadia fali ho sira nia kustu rasik. Nunee mos labele fo tan projetu ba kompanhia neebe hatudu ona kualidade servisu neebe la diak.
“Ita nia governu tenke matan moris ba kompanhia neebe halao servisu buka deit lukru, maibe haluha tiha kualidade,” kestiona sidadaun nee.
Antes nee Primeiru Ministru (PM), Kaya Rala Xanana Gusmao iha vizita servisu balu foin lalais nee fo ona avizu makas ba kompanhia sira. Governu fo hanoin katak kompanhia neebe la kumpri kualidade sei blaclist no la autoriza atu partisipa tan iha tenderizasaun foun.
(car)
