DILI, STLTIMORLESTE.com – Komunidade Aldeia Likarapoma, Suku Bairo Pite, Postu Administrativu Dom Aleixo, Munisipiu Dili, kestiona la asesu estrada.
Kestaun nee hatoo husi Komunidade Aldeia Likarapoma, Saturnina Sarmento ba STL, Kinta nee (19/02/2026).
“Aldeia Likarapoma durante tinan barak nia laran sira la asesu estrada, tanba dalan neebe mak daudaun nee sira asesu mak motor no ema lao ain mak bele liu ba mai, agora bainhira komunidade sira konstrui sira nia uma nee sira tenke lalin rai henek no fatuk husi estrada boot mak mai laran,” nia informa.
Komunidade Aldeia Likarapoma nee hatutan, durante sira halo uma nee lalin deit sasan, nee komunidade sira tenke lalin, tanba nee tinan barak ona mak sira seidauk asesu estrada too agora, ida nee mak difikuldade neebe mak durante nee sira enfrenta, tanba bainhira atu halo uma, hakarak ka lakohi sira tenke lalin sasan.
Entretantu Manuela de Jesus Gomes nudar joven hatete, los duni katak tinan barak ona sira seidauk asesu estrada hanesan ho maluk sira seluk husi suku seluk, tanba ida nee mak realidade, bainhira udan difikulta tebes sira, tanba dalan neebe sira uza ho motor ka lao ain nee tahu nakonu.
“Los duni katak tinan barak ona ami seidauk asesu estrada hanesan ho maluk sira husi suku seluk, tanba ida nee mak realidade, bainhira udan difikulta tebes sira, tanba dalan neebe Sira uza ho motor ka lao ain nee tahu nakonu,” nia haktuir.
(jac)
