BAUKAU, STLTIMORLESTE.com – Komunidade Aldeia Lialai-Lesu no Ossoua, Suku Tirilolo, Postu Administrativu Baukau Vila, koopera projetu reabilitasaun estrada diresaun Kairavela ba Aeroportu Lanud Baukau.
Xefe Suku Tirillolo, Elvino Freitas Belo esplika, projetu refere Governu liu husi Ministeriu Planeamentu no Investimentu Estratejiku (MPIE) kontratu kompanhia lokal rua hanesan Kompahia DVP Construction Unipesoal Lda no Kompanhia Central Hill Unipesoal Lda, neebe lansa fatuk dahuluk iha fulan Janeiru tinan nee too ohin loron hatudu progresu diak, tanba komunidade koopera ho parte kompanhia aselera progresu fiziku.
“Durante servisu iha dezentendimentu, tanba kona-ba komunidade sira nia plantasaun no kios, maibe nuudar Autoridade Suku tun koalia ba komunidade sira prontu kontribui,” hateten Elvino Freitas Belo ba jornalista STL iha Tirilolo, Buakau, Kuarta (21/05/2025).
Nia sublina, durante prosesu reabilitasaun estrada dirasaun Kairavela-Aeroportu Baukau lao afeita ba komunidade sira nia plantasaun hanesan ai-teka no seluk tan no afeta ba komunidade balun nia kios hetan sobu, tanba nee konsege hamosu dezentendimentu entre kompanhia no komunidade nain ba plantasaun no kios, maibe esforsu liu husi Autoridade Suku hodi solusiona, tanba dezenvolvimentu mak pasu importante ba komunidade no nasaun.
Nunee progresu reabilita estrada Kairavela-Aeroportu Baukau daudaun lao ho progresu diak, tanba parte kompanhia kuaze konstrui ona moru protesaun, valeta no ateru ho rai mutin neebe bainhira projetu remata sei fasilita liu tan movimentu transporte publiku no privadu sira.
“Durante nee komunidade neeba (area Kaisidu) afeta liu-liu ba estrada, tanba kondisaun aat, maibe komunidade sira kongratula ba Governu hadia estrada nee, komunidade hotu prontu kontribui,” Elvino Freitas Belo akresenta.
Xefe Suku Tirilolo nee argumentu, komunidade sira kontribui no oferese plantasaun sira hetan estragus no kios balun hetan sobu, tanba hakarak asesu kondisaun estrada diak hodi transporta produtu lokal asesu merkadoria.
Nia realsa, durante tinan barak komunidade sira husi Aldeia Lialai-Lesu, Ossoua, Parlamentu no Kaisidu difisil lori produtu lokal ba merkadoria, maibe liu husi esforsu Governu hahu responde ona, tanba nee agradese.
Entretantu projetu reabilitasaun estrada dirasaun Kairavela-Aeroportu distansia km 8 resin neebe kompanhia DVP Construction Unipesoal Lda responsabiliza ba distansia (5,000 M) ho valor orsamentu US$ 4,386,542.91 no kompanhia Central Hill Unipesoal Lda responsabiliza ba distansia (3.240 M) ho valor orsamentu US$ 2,537,086, neebe tuir kontratu durasaun servisu fulan 12.
(tom)
