DILI, STLTIMORLESTE.com – Komunidade husi Suku Labarai, Postu Administrativu Suai Vila, Munisipiu Kovalima, too oras nee sei preokupa ho mediku inklui mos stok out aimoruk.
Kestaun nee Xefe Suku Labarai, Paulo de Sena ba jornalista sira iha palasiu Prezidensial Nicolau Lobato, Bairo Pite, Tersa nee (08/04/2025) hatete, iha sira nia suku komunidade too oras nee sei preokupa ho aimoruk tanba iha sentru saude ida maibe komunidade ba halo tratamentu aimoruk laiha, aleinde nee menus mos mediku, tanba nee nia husu Governu tau atensaun.
“Iha hau nia Suku Labarai hau nia komunidade preokupa premeiru mak ba iha saude, tanba iha hau nia suku iha postu saude ida iha neeba, maibe laiha aimoruk, tanba nee hau nia komunidade ezije liu-liu ba aimoruk, tanba dala barak inan isin rua ho inan fo susu sira ba konsulta mediku menus haruka sira fila no sira ba konsulta fali iha Postu Suai Vila, maibe too iha neeba mos nafatin aimoruk laiha,” katak Xefe Suku.
Nia hatete, relasiona ho preokupasaun sira nee, nuudar autoridade lokal relata ona ba iha Governu nunee bele tau atensaun liu-liu aumenta mediku inklui mos fasilita aimoruk.
“Hau nia rekomendasaun ba iha Governu liu-liu ba iha saude nian bele fasilita no aumenta aimoruk, tanba iha hau nia suku iha psoto saude ida iha neeba maibe aimoruk menus tebes,” katak Xefe Suku.
Nunee mos Julio Pereira Alves, Xefe Suku Fohorem, Postu Administrativu Fohorem, Munisipiu Kovalima hatutan, nia mos ohin lori hela proposta mai iha Palasiu Prezidensial hodi bele husu Terapia Raimor hodi ba halo terapia ba komunidade sira neebe labele asesu ba saude tanba klinika dook, no komunidade balun re-koopera bainhira hetan terapia, no sira husu atu kontinua halo terapia, tanba nee sira lori proposta mai.
“Ligadu ho komunidade neebe mak hasoru moras oin-oin, maibe ami fiar katak iha palasiu iha mos tratamentu ida Tarapia Raimor neebe foin daudaun halo tratamentu iha Suai ami nia komunidade sira entuziasmu hakarak Terapia Raimor too iha ami nia suku, tanba ema barak mak moras iha baze suku neeba sira labele mai Suai Vila, entau sira presiza, entaun bazeia ba ida nee ami koordena malu ho ekipa nee no ekipa hatete katak presiza karta ruma husi lideransa komunitaria mak ami tun, tanba nee mak ami ohin aproveita tempu lori hela karta mai submete nunee komunidade sira bele hetan tratamentu,” Katak Xefe Suku.
Nia hatete, komunidade sira iha suku refere maioria moras tensaun, struk, maibe husi terapai neebe mak halo husi ekipa Raimor balun re-koopera ona, tanba nee autoridade lokal lori proposta mai iha palasiu nunee husu ekipa hodi halo Terapia ba komunidade sira.
Komunidade neebe mak presiza halo terapia husi Suku Fohorem, Postu Administrativu Fohorem, Munisipiu Kovalima, Suku nee iha aldeia 5, total populasaun rihun 700 resin.
(eme)
