DILI, STLTIMORLESTE.com – Ekipa Raut Lixu husi Administrasaun Munisipiu Díli (ADM) husu ba komunidade sira atu labele soe foer ka lixu iha estrada ninin, maibe soe iha Box lixu neebe ADM monta ona.
“Ami husu ba komunidade iha Suku Manleuna katak, ita tenke iha konsiensia hodi soe lixu nee iha nia fatin, labele soe fali iha estrada publiku, nee ita hatudu katak, la hadomi ita nia ambiente,” hatete Ekipa Raut foer iha Sidade Dili, Lorencio da Silva Monteiro ba STL iha Manleuna, Segunda nee (11/11/2024).
Nia dehan, iha Suku Manleuna kuaze Box lixu monta hotu ona, maibe sira lakohi soe iha fatin lixu, maibe sira soe iha estrada ninin, depois anin huu ba mai fo imajen la diak ba publiku.
Iha fatin hanesan, Komunidade Manleuna, Zelito do Carmo deklara, governu monta ona fatin lixu iha Suku Manleuna, maibe iha bairu balu seidauk monta, sei kontinua uza fatin lixu neebe tuan.
“Ita haree Governu monta ona fatin lixu, maibe fatin lixu la too ba komunidade atu soe lixu iha nia fatin, tanba lixu fatin neebe sira monta kiik liu, lixu nakonu bele naklekar ba iha estrada publiku,” nia informa.
(jen)
