LAUTEM, STLTIMORLESTE.com – Komunidade Munisipiu Lautem, liu-liu iha Suku Com, husu ba Governu atu tau matan halo reabilitasaun ba infraestrutura Portu Com, tanba kondisaun la diak ona.
Tuir komunidade Justo de Oliveira ba STL iha Portu Com, Sabadu nee (22/02/2025) katak, sente triste tanba infraestrutura Portu Com, neebe harii kedan iha tempu Indonezia, ate agora tinan 24 ona Timor Leste (TL) ukun aan, Governu sedauk hadia, neebe hanesan komunidade baibain observa katak kondisaun Portu Com daudaun nakfera aat liu tan ona.
“Ami la ezije ba Governu atu hadia, maibe aset neebe husik hela iha tempu Indonezia sei bele karik planu hadia ona, atu nunee bele funsiona ho diak hodi fasilita roo kiik no boot tula sasan mai iha Lospalos liu husi Portu Com,” dehan nia.
Nia haktuir tan katak, durante nee roo peskas sira mak para iha Portu nee, balu kail ikan, malae sura tama sai Portu nee hodi hasai imajen furak natureza tasi ibun ho rai henek mutin no hateke ba foho ho natureza matak, maibe parte seluk, vizitor sira nee haree infraestrutura balu laran triste, maibe atu dehan nusa.
“Ami propoin nafatin ba Governu atu tau matan hadia ona ba Portu nee, atu ami nia oan sira bele utiliza iha loron ikus, tanba daudaun nee malae sira barak mak mai fatin nee,” dehan nia.
Iha sikun seluk estudante Bazika Filial Com, Deonozio Magalhaes sente triste tanba Portu Com abandona kleur ona.
“Ami hanesan estudante Com, maske ho idade sei kiik, ami mos husu ba Estadu atu reabilita ona Portu Com nee, atu aban bainrua ami boot ona bele utiliza ba atividades ekonomia ba povu Lautem, espesifiku iha komunidade Suku Com,” afirma nia.
Antes notisia nee hatun, seidauk hetan konfirmasaun husi autoridade lokal nomos Autoridade Portuariu Timor Leste ba funsionamentu aset Estadu Portu Com neebe oras nee aat ona.
(jos)
