BAUKAU, STLTIMORLESTE.com – Komunidade sira iha Suku Lelalai, Postu Administrativu Matebian, Munisipiu Baukau, tenke sosa bee moos husi bombeiru hafoin komsumu, tanba seidauk hetan kanalizasaun bee moos husi Autoridade kompetente sira.
Xefe Suku Lelalai, Salamao Fraga Fernandes esplika, iha tempu udan bee matan periodiku sira iha atu komunidade sira kuru hodi utiliza ba nesesidade loron-loron, maibe iha tempu bailoron obrogatoriu kada loron komunidade sira hasai osan husi US$ 2.00 too US$ 10.00 hodi sosa bee moos husi transporte bombeiru privadu sira hafoin utiliza ba nesesidade sira, tanba distansia entre uma komunidade dook.
“Komunidade Lelalai hasoru problema bee moos husi Indonezia nia tempu too mai ukun aan, tinan 23 ona komunidade sempre sosa bee bidon ida US$ 2.00, profil ida US$ 10.00 kada tempu bailoron, tanba bee matan dook,” hateten Salamao ba jornalista sira iha Vila Nova Baukau, Sesta (18/07/2025).
Nia sublina, mezmu Suku Lelalai rasik eziste bee matan naran Mitarae no Uaiburu, maibe razaun distansia dook kuaze lao besik kilometru tolu, nunee komunidade sira foti inisiativa iha tempu bailoron husi fulan Maiu too Dezembru obrigatoriu tenke sosa bee moos hodi konsumu no utiliza ba nesesidade seluk, tanba komunidade sira laiha forsa lao too bee matan hodi kuru.
Nia fundamenta, mezmu komunidade sira rendimentu menus atu sosa bee moos, maibe nee mak realidade komunidade sira tenke enfrenta tanba nesesidade.
“Komunidade sempre sosa bee, nee duni komunidade hasoru dezafiu kona-ba ekonomia nian, osan oituan neebe mak sira hetan husi toos no natar hakarak ga lakohi ita tenke gasta ba bee,” Salamao akresenta.
Nia argumentu, preokupasaun komunidade Lelalai nian kona-ba bee moos iha semana liu ba Autoridade Suku hamutuk ho ekipa Autoridade Munisipiu Baukau halo ona survei ba bee matan Ira Rogo Rogo no Iradae Buti neebe tuir planu sei kanaliza ba komunidade sira iha Postu Administrativu Matebian liu husi Orsamentu Jeral Estadu 2026.
Entretantu Suku Lelalai rejistu populasaun hamutuk 2031, husi Xefe familia 464, neebe eziste iha Aldeia Dawaduka, Desa, Maluru no Sorlelu.
(tom)
