DILI, STLTIMORLESTE.com – Komunidade Aldeia Lukarapoma, Suku Bairo Pite, Postu Administrativu Dom Aleixo, Munisipiu Dili, idak-idak hamoos valeta no halao limpeza tau lixu iha fatin neebe prepara ona.
Komunidade Aldeia Lukarapoma, Augosto Amaral hatoo lia hirak nee ba jornalista STL bainhira halao hela limpeza iha Aldeia Likarapoma, Domingu nee (10/08/2025).
“Ami nian fatin lixu iha ona no komunidade tau lixu nee iha fatin hodi evita susuk, nunee mos komunidade idak-idak halo limpeza iha valeta neebe besik sira nian uma no hamoos Aqua, plastiku, nee tenke tau iha fatin, tanba bainhira la hamoos valeta no la tau lixu iha fatin nee ita rasik mak hakarak kria susuk,” dehan nia.
Nunee mos juventude Rainaldo Gomes hatete, aleinde halo limpeza iha valeta, limpeza iha uma hun, kontrolu bazu aifunan, lata aat, bee nalihun, roda aat, buat sira nee mak kria susuk, oinsa idak-idak tenke konsiénsia rasik.
“Ita idak-idak halo limpeza iha valeta neebe mak besik hela ita nian uma, oinsa tau lixu iha fatin no labele soe arbiru lixu, tanba moras dengue nee liu husi susuk neebe mak tata ita, ho ida nee bainhira ita atu evita moras ida nee mak ita tenke halo limpeza iha ita nian uma hun,” nia afirma.
Nia akresenta, hili lixu neebe mak iha valeta tau iha fatin neebe mak prepara ona, udan hela deit nunee susuk mos barak, ita idak-idak mak tenke iha konsiensia hodi hamoos valeta, atu nunee evita susuk iha tempu udan,” katak.
Nunee mos komunidade Mariana dos Reis Martins dehan, oinsa ema idak-idak presiza iha konsiensia tau lixu iha fatin neebe mak iha, hamoos uma hun nunee evita susuk iha tempu udan.
“Hau sente ema idak-idak presiza iha konsiensia tau lixu iha fatin neebe mak iha, hamoos uma hun nunee evita susuk iha tempu udan,” tenik nia.
(eme)
