BAUKAU, STLTIMORLESTE.com – Komunidade Musulmanu agradese ba sarani Katolika sira iha Timor Leste no ba Estadu Timor Leste.
Konselheiru Komunidade Musulmanu Baukau, Ibrahim hateten, iha Timor Leste dominante ho sarani Katolika no sikat husi komunidade Musulmanu neebe sei sura ho liman fuan, maibe iha relasaun diak konaba atividade fiar nian, tanba toleransi entre relijiozu no haforsa mos husi ran jerasaun mezmu mai ho relijiaun keta ketak.
Nunee agradese ba sarani Katolika sira iha Timor Leste, liu liu iha Munisipiu Baukau tanba iha laiha hanoin diskriminasaun hasoru ezistensia komunidade Musulmanu iha Timor Leste.
“Iha Baukau ambiente Katolika mak barak, maibe sira komprende, jadi istilah toleransi nee seidauk koalia familia iha tiha ona, durante nee laiha intimidasaun hasoru ami buat hotu lao diak,” hateten Ibrahim ba STL iha Masjid Al-Amal Baukau, Sesta (20/03/2026)
Aleinde mos nia aprezenta komunidade Musulmanu iha Timor Leste agradese Estadu Timor Leste, tanba bele deside loron Idul Fitri iha kadendariu nasional hodi aplika feiras nasional fo oportunidade ba komunidade Musulmanu selebra loron Idul Fitri.
Tanba nee kompromete komunidade Musulmanu iha dever atu kontribui iha prosesu dezenvolvimentu liu husi kria pas no estabilidade entre relijiozu iha Timor Leste nomos sei halo kooperasaun diak ho igreja Katolika hodi eduka sosiedade Timor Leste.
“Ami kalan kalan fo dutrina ba ita nia umat sira nee para oinsa labele halo problema rai sira nia aan, mensajen mak nee, Islam nee ba ema hotu, mezmu ami oituan, maibe ita tau ita nia aan iha nasaun ida nia laran, nasaun rekonhese ita ita mos tenke rekonhese nasaun hamutuk lori nasaun nee ba oin,” Ibrahim argumentu.
Iha fatin hanesan, Diretor fundasaun An-Nur Filial Baukau, Muhammad Carlos B. da Costa Soares hateten, iha selebrasaun loron Idul Fitri 1 Syawal 1447H ho moto neebe kontinua kontribui pas no estabilidade iha Timor Leste.
“Ami nia moto ba ida nee mak unidade no pas haksolok iha rai Republika Demokratika de Timor Leste,” hateten Muhammad Carlos
Nia fo razaun, selebra tinan nee ho moto refere, tanba komunidade Musulmanu hakarak kontribui pas no estabilidade iha Timor Leste relasiona ho funu neebe daudaun akontese iha mundu afeta ba ekonomia global.
Nunee iha selebrasaun loron Idul Fitri Syawal nee, komunidade Musulmanu iha Timor-Leste liu liu iha Munisipiu Baukau nafatin iha esperansa konvida maluk sira husi relijiaun seluk atu hametin unidade nasional hodi ganha progresu dezenvolvimentu iha Timor Leste.
“Esperansa ami nia iha selebrasaun ida nee, biar pun ami minorita iha ita nia Pais ida nee, maibe ita nafatin unidade,” Muhammad Carlos espresa.
Entretantu tuir dadus sensus Muslumanu iha Baukau hamutuk 600 resin neebe rejistu husi Postu Administrativu sira iha Munisipiu Baukau.
(tom)
