BAUKAU, STLTIMORLESTE.com – Relasiona falesimentu Sua Santidade Papa Francisco, Komunidade Musulmanu no husi Igreja Kristaun Evanjelika iha Munisipiu Baukau, sente lakon lideransa espiritual iha mundu.
Tuir Xefe Komunidade Musulmanu Baukau, Samsul Bahari Ribeiro katak, Papa Francisco nuudar lider pluralizmu iha mundu neebe akumula lider relijiozu hotu hodi hametin fraternidade umana entre relijiozu, tanba komparasaun entre komunidade musulmanu no sarani Katolika iha Timor Leste, mezmu sarani Katolika ho pursentu makaas, maibe durante lidera husi Papa Francisco la hamosu diskriminasaun, tanba ho vizaun toleransia entre relijiozu iha mundu.
Nunee falesimentu Papa Francisco laos deit fo tristeza ba sarani Katolika iha mundu, maibe afeta mos ba relijiaun seluk, tanba nuudar lider pluralizmu no toleransia iha mundu.
“Ami sente lakon tebes, tanba figura neebe diak no uniku iha mundu, nia mak toleransia liu iha mundu, laos sarani Katolika deit mak lakon, maibe ami musulmanu mos lakon,” hateten Samsul ba jornalista sira iha Vila Nova, Baukau, Tersa (22/04/2025).
Nia husu, bainhira vatikanu liu husi eleisaun ba kandidatu Papa foun, tenke fihir kandidatu neebe bele lori vizaun Papa Francisco, neebe kontinua hametin fraternidade umana no toleransia entre relijiozu iha mundu.
Enkuantu reprezentante Komunidade Igreja Kristaun Evanjelika Baukau, Pastor Anacleto dos Santos hateten, Papa Francisco laos lider masimu ba deit sarani Katolika iha mundu, maibe lider neebe hametin pas no unidade iha mundu, tanba nee falesimentu Papa Francisco hafalun tristeza ba ema hotu iha mundu.
“Ami mos sente lakon lideransa relijiozu iha mundu tomak, tanba nee ami turut berdukacita ba lider mundu ida lakon iha ita nia klaran, laos ba maun alin Katolika deit, maibe ami mos sente lakon,” nia hateten.
Nunee nia husu kandidatu Papa foun nafatin hametin pas no dame ba mundu hanesan Papa Francisco halo, liu husi lao vizita ba nasaun sira hodi habelar lia loos ba ema hotu hafoin hakotu iis.
Entretantu Sua Santidade Papa Francisco hakotu iis ho idade 88, iha loron 21 abril 2025 iha tuku 07:35 oras vatikanu.
(tom)
