PASABE, STLTIMORLESTE.com – Komunidade Aldeia Naetuna, Suku Abani, Postu Administrativu Pasabe, Rejiaun Administrativa Espesial Oecusse-Ambeno (RAEOA) preokupa tebes ho bee iha tempu bailoron araska loos, tanba sira hela iha laletek, bee iha rai okos, tanba nee husu ba Governu atu apoiu makina ruma nunee bele supa bee iha tempu bailoron hodi utiliza ba rega modo nomos bee hemu loron-loron nian.
Kestaun nee lebenta husi Xefe Aldeia Naetuna, Antonio Sila ba STL iha Naetuna Pasabe, Tersa (2/9/2025) katak, tempu bailoron ona hanesan nee, sira nia preokupasaun principal maka bee mos sempre laiha, tanba bee iha rai okos, maibe komunidade hela iha laletek.
“Ami husu ba governu atu bele tau matan ba ami nia preokupasaun principal nee, ami iha tempu bailoron hanesan nee, sempre hasoru problema bee la sufisiente ba povu atu utiliza ba konsumu nian nomos rega modo,” dehan Xefe Aldeia Naetuna.
Nia haktuir tan katak, iha sira nia aldeia nee, rai potensial tebes maibe problema ba sira maka bee iha rai okos, sira hela iha laletek, neebe husu ba governu, karik bele tau matan ba problema nee atu nunee povu bele asesu ba bee mos.
Iha oportunidade seluk, Nercia Colo nuudar inan feto hortikultura Naetuna konfesa katak, kada tinan kuandu udan too deit fulan Marsu maka udan para ona, entaun durasaun fulan tolu deit sira asesu bee moos too deit fulan Junhu, bee matan sira nee maran ona, maibe kuandu udan been remata iha fulan Junhu, entaun sira nia bee matan nee kontinua aguenta too fulan Novembru maka bee matan sira nee maran, maibe iha naetuna leten nee, kada tinan sira sempre preokua ho bee mos.
“Ami komunidade iha Bairru Naetuna, hela besik kapela nee, bee sempre sufisiente uitoan, depende husi udan bee kuandu para iha fulan Marsu maka fulan junhu kada tinan, sempre araska ona ho bee moos, maibe kuandu udan been kontinua too fulan Junhu, entaun ami bele asesu bee mos nee too fulan Novembru, uza bee nee hodi rega modo no uza ba konsumu nian,” dehan Nercia Colo.
Tuir observasaun STL iha Aldeia Naetuna fronteira ho suku Usi takeno, iha area laletek, bee sempre araska, maibe iha Bairru Naetuna besik kapela, bee sempre sufisiente no komunidade utiliza sira nia natar nee hodi kuda modo oi-oin hanesan Repolho, Brinjela, alfase, modo mutin, modo metan, liis mutin ho liis mean, nomos aihan hortikultura seluk-seluk tan iha sira nia bairru, sai matak no buras iha uma oin no kotuk, haree modo mesak fresku deit.
Jornalista: Joseph Koa
Editor: Joseph Koa
