DILI, STLTIMORLESTE.com – Komunidade aldeia rua hanesan Aldeia Halibur no Liru iha Suku Motael durante nee okupa hela fatin husi tempu okupasaun Portuges no Indonezia nian.
Xefe Suku Motael, Luis António Gusmão Viegas dehan, iha Suku Motael maioria komunidade sira hela iha uma antigu sira husi okupasaun Portuges no Indonezia nian.
“Ita nia komunidade iha aldeia rua hanesan Halibur no Liru nee, kuaze okupa uma sira neebe mak husik hela iha tempu okupasaun Portuges no Indonezia mai too ohin loron,” hatete Luis ba STL iha Suku Motael, Sesta (17/1/2025).
Nia dehan, komunidade iha aldeia rua nee kuaze xefi familia hamutuk 300 mak okupa rai no uma estadu nee.
“Tuir lo-loos uma sira husi okupasaun Portuges mai too Indonezia nee estadu nian ona, maibe ita nia komunidade sira okupa tiha,” nia tenik.
Luis dehan, antes nee autoridade lokal halo ona sosializasaun ba komunidade sira, no komunidade sira neebe okupa uma hirak nee mos prontu husik hela fatin nee bainhira estadu haruka sira sai.
Nunee iha fulan ida nee sira iha ona planu atu halo tan enkontru ho komunidade sira kona-ba espasu sira neebe tama iha mapamentu eviksaun nian.
Entretantu okupante Matilde Sarmento dehan, koalia kona-ba dezenvolvimentu povu hotu apoiu no kuntribui.
“Maibe ami husu antes atu mai halo eviksaun tenke halo mediasaun no fo prazu ba ami, atu nunee ami bele buka fatin ruma,” nia deklara.
(jen)
