DILI, STLTIMORLESTE.com – Komunidade neebe okupa rai Prezidensia Republika (PR) nia kotuk, bainhira sai sei hetan kompensasaun husi Governu.
Komunidade neebe hela iha Palasiu Prezidensial nia kotuk sei sai, tanba rai refere sei halo Dormitoriu ba foinsae feto sira hodi hela, maibe komunidade neebe okupa rai refere oras nee halo ona negosiasaun ho Prezidensia Republika ho Governu, bainhira loke ona bankaria Governu sei transfere osan ba komunidade sira.
Kestaun nee hatoo husi Prezidente Republika Jose Ramos Horta ba jornalista sira iha Palasiu Prezidensial Republika, Sesta nee (25/07/2025).
“Prezidensia laiha falha ho ida nee, laiha demora ba ida nee, sei iha tan ida ka rua ke seidauk tau naran karik, nee hau la hatene maibe sei iha karik klaru Prezidensia prontu atu tuur koalia ho sira para rona buat ruma,” katak PR Horta.
Prezidente Republika hatete, komunidade sira halo ona negosiasaun ho parte Governu nomos Prezidensia Republika.
“Nee kleur ona halo negosiasaun ho sira hotu-hotu, prezidensia rasik maibe negosiasaun dialogu nee ho Ministeriu Justisa, Obras Publika sira, primeiru hetan naran familia 61 depois idak-idak mak hatete sira hotu-hotu diak prontu atu muda, sira presiza mak klaru kompensasaun, no kompensasaun nee Obras Publika, Ministeriu Justisa mak halo dialogu mak hatene idak-idak kada uma kain kompensasaun hira,” katak PR Horta.
Prezidente Republika hatete, durante dialogu balun hatete kompensasaun neebe atu fo sira la too, entau sira halo dialogu fila fali buat neebe Governu haree justu selu.
“Prezidensia hamutuk ho Ministeriu Justisa, Obras Publika rekolha sira nia naran depois sira idak-idak tenke loke konta iha banku, kuandu konta banku loke ona osan ba direitamente sira nia konta bankaria iha banku, ho Prezidensia laiha falha ho ida nee laiha demora ba ida nee, sei iha tan ida ka rua ke seidauk tau naran karik nee hau la hatene maibe sei iha karik klaru Prezidensia prontu atu tuur koalia ho sira para rona buat ruma falhansu ruma karik,” katak PR Horta.
Prezidente Republika hatete, rai neebe komunidade okupa partense ba Prezidensia Republika nia, rai nee sei utiliza hodi halo dormitoriu ba foinsae feto sira hodi hela, antes nee Prezidente Republika koalia ona ho Madre Guilermina atu halo dormitoriu iha Balide, Madre Timoroan hatan maibe madre superiora sira husi Roma mak resposta tarde, tanba nee Prezidente Republika ho inisiativa deside halo iha Palasiu Prezidensia nia kotuk.
Prosesu halo Dormitoriu nee atu hahu ona iha tinan ida nee nia laran, obras hahu too 2026 bele prontu ona, bele hatama labarik oan feto sira neebe idade universidade bele too atus tolu too atus lima, fatin nee modernu 100%, por ezemplu se uza deit painel solar sei iha Sistema para akapta udan been bee neebe uza sei halo resiklajen nee premeiru iha Timor.
“Nee hau mak hakarak halo nunee sira konkorda nee sistema modernu uza painel solar depois la gasta osan ba eletrisidade tanba eletrisidade karun tebes, segundu akapta udan been, aleinde ida nee bee neebe uza iha dapur no haris fatin ba neebe halo resiklajen ho sistema resiklajen uma nee nia,” katak PR Horta.
Aleinde nee bee neebe uza resiklajen bele uza fali rega jardin ka fase ropa tein tanba sistema modernu.
PR hatete, koalia ona ordem madre salesiana mak toma konta, la presiza barak tanba feto hotu hotu maioria boot ona laos kosok oan neebe ema tenke ba haree depois organiza didiak feto foinsae neebe hela iha Dormitoriu nee sira mak sei organiza malu halo orariu rotasaun ba tein, hamoos uma no seluk tan, maibe iha madre balun para orienta sira.
Sidadaun foinsae neebe hela dormitoriu, primeiru ano la selu, tuir mai bele selu maibe tuir buat neebe sira bele US$10 kada fulan ou US$ 5 kada fulan, konforme sira nia kbiit neebe iha, no Prezidente mos sei halo eskola Ship ida loke daudaun ona, aban ka bainrua hanesan nee tama ona Ministeriu Justisa, nomos estudante neebe mak labele selu fundasaun mak sei selu ba sira.
Dormitoriu nee sei fo prioridade liu ba oan kiak sira liu-liu estudante neebe inan aman kiak no laiha fatin nia oan sira mak sei hela hodi halo sira nia estudu.
(eme)
