BAUKAU, STLTIMORLESTE.com – Komunidade sira iha Suku Defawasi, Postu Administrativu Baguia, Munisipiu Baukau preokupa estrada ba Suku Defawasi, tanba kondisaun aat.
Komunidade Filomeno Alves Ximenes informa, habitante neebe eziste iha Aldeia Defawasi ho xefe familia besik uma kain 50 moris agrikultor iha neebe rendimentu sustenta ekonomia familia mai husi faan produtu lokal, maibe iha tempu udan komunidade sira infrenta menus rendimentu, tanba kondisaun estrada aat difikulta komunidade sira lori produtu lokal ba merkadu ho transporte sira.
“Ami iha nee preokupa mak kona-ba estrada, tanba atu asesu ba merkadu mos transporte araska, estrada husi Laribere too Buawa too Defawasi leten no kraik nee mak kondisaun aat,” Filomeno hateten ba jornalista sira iha Defawasi, Kuarta (28/01/2026)
Tuir komunidade nee katak, estrada ligasaun refere husi Buawa too Laribere Defawasi liu kilometru 16 iha neebe, tempu udan difikulta komunidade sira nia movimentasaun ho transporte publiku atu transporta produtu lokal husi area refere ba merkadu Munisipal no Postu.
Tanba nee husu Ministeriu Obras Publikas atu halo reabilitasaun ba estrada refere nunee iha tempu udan nafatin fasilita movimentasaun komunidade sira ho transporte publiku no privadu, tanba aleinde difikulta tula produtu lokal ba merkadu difikulta mos komunidade sira neebe ho kondisaun moras atu asesu fasilidade saude.
“Hau rekomenda ba Governu se bele karik haree mos ami nia estrada, tanba iha nee ami mos lao dook mak foin too Postu saude Lavateri mos kilometru lubuk ida, maibe ami nia estrada la diak kareta laiha ami lao deit mak ba Postu Saude Lavateri,” Filomeno sujere
Iha fatin hanesan, Xefe Suku Defawasi Salustiano Ximenes Guterres akresenta, problema neebe dauduan komunidade sira infrente mak estrada, tanba kondisaun estrada aat no grave, maibe seidauk iha atensaun husi Ministeriu relevante.
“Dala ruma ami komunidade sira atu tula sai sira nia produtu ba asesu merkadoria mos susar, tanba kondisaun estrada difikulta tebes movimentasaun transporte, bee nalihun iha fatin fatin dala barak ita ho motor monu. Kuandu familia ruma moras loron sei ajuda malu neebe diak, mais derepente moras iha tempu kalan ho kondisaun emerjensia hanesan nee ema ajuda ita mos tauk,” Salustiano espresa
Xefe Suku nee rekomenda ba Ministeriu Obras Publikas atu halo reabilitasaun ba kondisaun estrada refere, nunee iha tempu udan no bailoron kontinua fo vantajen ba komunidade sira nia movimentasaun ho transporte publiku no privadu, tanba estrada refere iha tempu udan transporte labele asesu hodi tula sai komunidade sira nia produtu lokal ba merkadu.
Liga asuntu nee STL tenta konfirma Koordenador Tekniku Obras Publikas Destakadu Munisipiu Baukau, maibe lakohi fo komentariu.
(tom)
