DILI, STLTIMORLESTE.com – Komunidade sira preokupa ho ema moras mental neebe oras nee movimentu iha Dili no Munisipiu sira seluk, tanba familia la tau matan.
Preokupasaun nee hatoo husi husi Mariano da Costa, hanesan Jerasaun Patriota ba jornalista STL liu husi menssenger, Tersa nee (06/01/2026).
“Hau preokupa kona-ba ita nia sidadaun balu neebe sofre moras mental sei abnadona hela husi familia iha munisipiu hotu. Governu iha dever atu fo atensaun hodi kria fatin ruma, oinsa atu akomoda sira, fo asistensia neebe diak hodi bele rekupera”, dehan Mariano.
Hanesan Jerasaun Patriota Mariano hakarak fo asistensia ba ema moras mental. Tanba moras mental nee presiza asistensia ida neebe rigorozu no kolaborasaun ho familia, maibe familia barak haree nia familia balu sofre moras mental husik hela deit.
Tanba maioria sira neebe sofre moras mental nee ho idade produtivu, hanesan agora iha munisipiu hotu, sira namkari loos iha fatin-fatin, neebe presiza fatin ida hanesan ho iha Laklubar no fatin seluk.
Iha parte ketak Luciano da Silva hanesan Akademista UNDIL hatete, atendimentu ba ema sira neebe moras metal sei sai problema ida neebe too ohin loron governu seidauk bele rezolve ho diak, ida nee prova husi dadus neebe organizasaun naun govermental sira rekolha.
Jornalista: Carme Ximenes
