DILI, STLTIMORLESTE.com – Komunidade sira neebe hela iha area rural prokupa ho kondisaun estrada, tanba estrada aat tebes bainhira udan karreta labele serkula ba iha sira nia hela fatin.
Kestaun nee hatoo husi Komunidade Aldeia Hatulelo (Munisipiu Ainaro), Mario de Araujo ba STL, iha Mini Merkadu Perumnas, Dili, Kinta (08/01/2026).
Nia dehan, buat neebe sai preokupasaun ba sira mak estrada, tanba estrada aat tebes bainhira udan karreta labele tama iha sira nia hela fatin. “Ami komunidade komunidade Hatulelo nia preokupasaun boot mak estrada, tanba estrada aat tebes hodi impata ami nia viajen husi area rurais ba postu no Munisipiu,” dehan Mario.
Mario konta estrada la diak hahu kedas iha tempu Indonezia mai too ohin loron, kuandu tempu bailoron karreta halai neneik bele ba iha sira nia hela fatin, maibe tempu udan susar,”Bailoron diak oituan, maibe kuandu udan ona lao ladiak, tanba tahu dodok depois mota boot ponte laiha atu ita liu ba mai,”Mario komenta.
Iha parte ketak Observador Politika, Martinho da Silva hatete, estrada husi Suku liga Postu no Munisipiu sira aat hodi difikulta populsaun lori sira nia produtu lokal ba faan iha merkadu.
“Kuandu tempu udan ita haree komunidade sira difisil, atu lori sira nia produtu lokal ba asesu iha merkadu, tanba nee governu presiza hadia estrada sira neebe aat iha Suku liga ba Postu no Munisipiu,” katak Martinho.
Reportajen: Carme Ximenes
