DILI, STLTIMORLESTE.com – Komunidade iha kapital Dili no mos munisipiu sira hahu sente preokupa ho sirkukasaun moeda falsu 20 sentavus neebe aumenta makaas iha kantu loja no merkadu sira. Sidadaun barak mak sai ona vitima, tanba osan besi nee hodi sosa sasan maibe ikus mai loja nain sira rejeita fali.
Tuir sasin negosiante ambulante iha mini merkadu Perumnas, Lucinda Soares katak, nia lakon ona rendimentu loron ida nian, tanba simu osan falsu. ”Ami tauk ona atu simu osan besi 20 sentavus, tanba bainhira ami lori ba sosa fali sasan iha loja boot, sira dehan osan nee falsu. Ami povu kiik mak terus tanba osan nee mai ami nia moris,” dehan Lucinda ba STL iha mini merkadu Perumnas, Dili, Sesta (13/03/2026).
Iha parte ketak komunidade sira mos kestiona kbiit husi Autoridade sira atu kontrola sirkulasaun moeda nee.Tuir sira moeda falsu nee iha koor no forma neebe moos tebes, halo susar ba ema baibain atu identifika ho matan deit.
“Iha bairru laran ema barak mak diskuti malu tanba osan nee. Balun dehan kor osan mean iha laran nee kofek lalais no mental nee kman liu fali ida baibain,” hatete Jacarias Mendonca, sidadaun ida iha Bairo Pite.
Preokupasaun nee mos afeta ba transporte publiku hanesan mikroket. Motorista ka sofer sira hahu kontrola didiak osan neebe pasajeiru sira entrega. Se ida nee kontinua komunidade tauk katak sei iha krize konfiansa ba uza moeda sentavus iha futuru.
Komunidade sira husu ba Banku Sentral Timor Leste no Polisia, atu foti medida hodi para sirkulasaun nee, no fo edukasaun neebe klaru liu ba povu iha baze kona-ba oinsa destinge osan loloos ho falsu, nunee labele iha tan vitima foun.
(car)
