BAUKAU, STLTIMORLESTE.com – Komunidade preokupa ho Diresaun Munisipal Konservatoriu Servisu Rejistu Notariadu (DMKSRN) Baukau nia atendimentu iha loron Sesta feira kada semana.
Preokupasaun nee Komunidade husi Aldeia Butileo, Suku Baguia, Postu Administrativu Kelikai, Ivo Gusmão Belo hatoo ba STL iha resintu DMKSRN Baukau, Sesta (23/01/2026).
“Hau la dun satisfas ho atendimentu iha nee, tanba loloos sira limpeza iha dadersan, baibain iha nee kada Sesta sira limpeza husi jam 07:00 too 08:00 sira limpeza tiha laiha kontinuasaun de servisu, maibe sira ba fali uma deskansa,” nia dehan.
Tuir komunidade nee katak, kada semana iha loron Sesta feira funsionariu no funsionaria sira iha edifisiu DMKSRN Baukau hahu halo limpeza durante oras ida no bainhira limpeza remata funsionariu ho funsionaria sira fila hikas ona ba sira nia uma.
Maibe tuir Ivo Gusmão Belo, loloos situasaun nee labele akontese, tanba servisu limpeza halao deit iha oras ida no bainhira servisu limpeza remata bele kontinua hikas fo atendimentu ba komunidade sira neebe marka prezensa iha edifisiu atu trata dokumentus, laos funsionariu ho funsionaria sira ba fali uma hodi deskansa.
“Sira nia deskansa nee liu fali oras servisu nian, ita hatene iha Timor oras servisu nian hamutuk oras 8, hahu husi jam 08:00 too jam 12:00 depois free too jam 02:00 kontinua servisu, maibe ita haree ida nee sira deskansa ba fali oras 6 servisu iha oras 4 deit, sa limpeza ida mak too fali jam 12 too jam 02 mak loke fali, nee fo impaktu ba ami neebe mai atu trara dokumentus iha nee,” Ivo komenta.
Nia argumentu, servisu DMKSRN Baukau neebe ho modelu iha loron Sesta feira laiha atendimentu husi dader oras servisu too meudia nee fo impaktu ba komunidade sira neebe prezisa trata dokumentus sira, tanba edifisiu taka.
Ivo husu Governu atu rekruta pesoal kliner destaka iha edifisiu DMKSRN Baukau nunee bele ajuda funsionariu no funsionaria sira iha edifisiu refere la lakon tempu ba limpeza iha loron Sesta feira kada semana, maibe fo atendimentu ba komunidade sira neebe presiza trara dokumentus, tanba dokumentus mak dalan ida neebe atu lori sidadaun ida ba asesu vaga sira, maibe atendimentu publiku kontinua lentu.
Liga asuntu nee, STL tenta konfirma resposavel masimu DMKSRN Baukau, maibe laiha fatin atu fo komentariu, tanba edifisiu taka.
(tom)
