AMBENO, STLTIMORLESTE.com – Komunidade Bairu Samoro, Aldeia Sanane, Suku Costa, Postu Administrativu Pantemakassar, Rejiaun Administrativu Espesial Oekusi-Ambeno (RAEOA) husu ba Kompanhia Nelcis atu hapara kontratu ba trabalhador tuan neebe mak durante nee halao servisu Cleaning Service no Seguransa iha edifisiu Servisu Aqua no Sanitaria (SAS) Oekusi hodi rekruta fali trabalhador foun, atu komunidade no juventude iha bairu nee bele hetan hotu servisu.
Tuir Portavos Juventude Bairu Samoro, Leopoldina Maria Antonia Tobe liu husi konfrensia imprensa iha Samoro, Kuarta (12/03/2025) hatete, komunidade iha Bairu Samoro kompostu husi lia nain, Xefe Bairu ho juventude Samoro, rejeita no la simu Kompanhia Nelcis neebe mak manan tender kona-ba Cleaning Service iha edifisiu SAS Fulolo.
“Ami lia nain, Xefe Bairu husi Samoro rejeita no la simu Kompanhia Nelcis, neebe manan tender kona-ba Cleanig Service, maske nia manan ona liu husi tenderizasaun, maibe nia la konsidera ami lia nain Samoro. Tanba nee, ami rejeita, la simu. Ami nia hakarak tenke troka malu servisu, hodi nunee bele fo tempu ba maluk sira seluk, tanba ami haree durane nee balu servisu kleur ona, balu servisu tinan 5, balu servisu too tinan 10 ona,” dehan nia.
Nia haktuir iha konfrensia nee katak, karik kompanhia la konsidera hodi rona sira nia preokupasaun nee, mak komunidade iha Bairu Samoro sei hamriik hodi hasoru kompanhia se deit, tantu Kompanhia Nelcis ou Kompanhia Security.
Iha oportunidade hanesan, Arlindo Elu nuudar Lia Nain Bairru Samoro dehan, la simu sira neebe mak servisu iha parte seguransa tinan 10 ona hodi kontinua servisu iha Edifisiu SAS Fulolo, realidade juventude dezempregu barak iha Bairu Samoro, tenke troka malu.
“Durante nee kompanhia lori kedan ninia ema, la konsidera komunidade iha Bairu Samoro hodi hetan kampu servisu, Edifisiu SAS harii iha Bairu Samoro, husu ba kompanhia atu hatama juventude iha Bairu Samoro tanba barak mak sei dezempregu,” dehan nia.
Nunee mos Domingos Abi nuudar Xefe Bairu Samoro dehan, sira la kontra Estadu so husu deit ba kompanhia atu konsidera autoridade ho juventude inklui Lia Nain sira iha Bairu Samoro, tenke fo oportunidade ba juventude sira iha Bairu Samoro.
“Ami komunidade Samoro husu ba Kompanhia Nelcis atu hasai hotu trabalhador tuan sira nee no rekruta fali trabalhador foun hodi envolve joven sira iha Bairu Samoro, tanba iha nee joven barak mak laiha kampu servisu, servisu troka malu fali, tanba balu tinan 5, balu servisu tinan 10 ona, tempu ona ba sira atu deskansa lai hodi fo tempu ba joven seluk iha Bairu Samoro neebe iha direitu atu hetan mos servisu,” afirma nia.
Too notisia nee hatun, STL sedauk hetan konfirmasaun husi Kompanhia Nelcis ba ezijensia nee.
(jos)
