BAUKAU, STLTIMORLESTE.com – Komunidade husi uma kain 80 iha Aldeia Itidaho Samaguia, Suku Tekinomata, Postu Administrativu Laga, Munisipiu Baukau, seidauk asesu linha eletrisidade.
Xefe Suku Tekinomata, Abílio Diamantino Ximenes hateten, periodu Timor ukun aan liu husi Governu nia esforsu kauze instala ona linha eletrisidade hodi kore ona komunidade sira iha territoriu nasional husi sunu lamparina iha tempu kalan, maibe komunidade balu iha Suku Tekinomata, liu liu iha Aldeia Itidaho no Samaguia nia area sira hanesan Luatara no Lalabu too ohin loron kontinua sunu lamparina iha tempu kalan, tanba seidauk asesu linha eletrisidade.
“Iha Tekinomata fatin rua mak durante nee seidauk asesu eletrisidade, mak Luatara baliza ho Afasa nee 60 Xefe familia Lalabu 20 Xefe familia, nee baliza ho Soba Boleha mak durante nee sei uza mina rai ba lamparina,” hateten Abílio ba jornalista STL iha Samaguia, Kinta (14/08/2025).
Nia sublina, komunidade husi uma kain 60 husi area Luatara neebe rejistradu seidauk asesu eletrisidade baliza ho Suku Afasa, Postu Administrativu Kelikai Antigu no uma kain 20 husi Lalabu baliza ho Aldeia Boleha, Suku Soba, Postu Laga neebe kuaze uma hela fatin besik rin eletrisidade, maibe labele asesu eletrisidade, tanba instalasaun neebe iha laiha fiu eletrisidade baixa tensaun.
Tanba durante tinan naruk iha faze ukun aan nee komunidade sira hasai osan gasta ba mina rai hodi halo lampu tradisional lamparina hafoin hetan naroman iha tempu kalan.
Entretantu liga ho asuntu nee jornalista STL tenta konfirma supervizor EDTL.EP Munisipiu Baukau, maibe laiha fatin atu fo resposta, tanba kondisaun moras.
Mezmu nunee, informasaun neebe STL asesu, uma kain 80 iha Aldeia Itidaho Samaguia neebe seidauk asesu eletrisidade sei responde iha tempu besik, tanba dadaun parte Nasional prepara ona tenderizasaun no bainhira iha ona kompanhia manan nain.
(tom)
