DILI, STLTIMORLESTE.com – Governu liu husi Ministeriu Saude (MS) husu ba Autoridade Lokal sira atu fo avizu beibeik ba komunidade sira limpeza loron-loron, hodi halo prevensaun ba moras dengue, tanba numeru moras dengue sempre kontinua aas.
Hatete Diretora Nasional Edukasaun Promosaun Saude iha Ministeriu Saude (MS), Emilia de Jesus Alves Mendonca ba STL iha Salaun Auditorium FCS UNTL, Kaikoli, Díli,Tersa (19/11/2024).
“Agora ita tama ona tempu ida monu rai, ita husu ba Autoridade Lokal sira atu avizu ba ita nia komunidade sira para limpeza loron-loron iha idak-idak nia hela fatin, liu-liu husu ba Autoridade Lokal sira atu mubiliza komunidade sira halo limpeza semana ida dala rua, hodi prevene moras dengue,” hatete Emilia.
Nia hatutan, Ministeriu Saude (MS) husu ba Autoridade Lokal, Komunidade sira, Juventude, Estudante sira, liu-liu ba uma kain idak-idak tenke halo limpleza iha idak-idak nia hela fatin hodi prevensaun ba moras dengue.
Iha ha fatin ketak, Xefe Suku KaiKoli, Hipolito Marques Sarmento apela ba komunidade atu prevene moras dengue liu husi limpeza beibeik iha uma-huun, liu husi sirkualar Konselhu Suku Kaikoli nian hatuur katak, kada xefe aldeia sira atu avizu ba komunidade atu limpeza iha sira nia rasik.
“Ami iha servisu sirkular entre membru konselhu suku ho komunidade, entaun xefe aldeia idak-idak ami avizu hotu ona, atu sira kontinua ba avizu ita nia komunidade no haree ita nia ema sira nee. Hanesan ohin hau koalia tiha ona katak, haree sira atu hamoos uma-huun halo moos, nunee labele hetan moras dengue,” nia tenik.
Nunee mos Komunidade Suku kaikoli, Juvita Ximenes deklara, Autoridade Lokal sira sempre avizu no sira halao limpeza kada semana ida dala rua, depois sira mos sempre limpeza loron-loron iha sira nia hela fatin.
(jen)
