BAUKAU, STLTIMORLESTE.com – Komunidade Suku Uaitame hakarak suspende Xefe Suku Uaitame, Celestino Freitas Moreira husi kargu Xefe Suku.
Ba informasaun refere, iha loron 22 Fevereiru 2025 STL asesu konvite husi komunidade Suku Uaitame katak, iha loron 23 Fevereiru nee atu realiza komunikadu imprensa iha Sede Suku Uaitame neebe atu hahu iha tuku 10:00 parte dader, no karta konvite ba komunikadu imprensa hetan asinatura husi porta voz Bartolomeu Moreira.
Planu realiza komunikadu imprensa refere hetan partisipasaun masimu husi komunidade sira no prezensa jornalista koresponde Munisipiu Baukau, husi media STL, Timor Post, RTTL.EP inklui mos Radio Komunidade Matebian Baukau atu halo kobertura ba atividade refere neebe foku ba asuntu 2, mak hanesan pedidu retirasaun husi Postu Kelikai Antigu no suspensaun kargu ba Xefe Suku Uaitame.
Maibe komunikadu imprensa la realiza, tanba mosu Administrador Postu Kelikai, Paulo Jacinto Moreira too fatin hodi bolu pesoal organizador sira fo hanoin neebe rezultadu ikus komunikadu imprensa la konsege realiza.
Mezmu komunikadu imprensa la realiza, maibe panfletu neebe estabelese katak, komunidade Uaitame husi Aldeia Gamana, Karanu, Sialimu no Gugulai sorin retira total husi Postu Kelikai Antigu no mantein iha Kelikai, tanba distansia.
No Porta Voz Bartolomeu Moreira konfesa katak, suspensaun kargu ba Xefe Suku Uaitame nee, tanba Xefe Suku abandona Sede Suku no la interese komunidade nia nesesidade trata dokumentus.
“Komunidade nia nesesidade hanesan trata dokumentu ruma, joven sira kontinua sira nia estudu, balu trata dokumentu ba liur, ida nee mak komunidade nia preokupasaun nee mak ami sita iha laran (suspensaun kargu ba Xefe Suku Uaitame)”, hateten Bartolomeu liu husi telefone ba STL, iha semana ikus fulan Fevereiru tinan 2025.
Nia sublina, kona-ba nesesidade tratamentu neebe Xefe Suku Uaitame la atende, tanba komunidade hakarak Xefe Suku utiliza karimbu suku tuan neebe pertense ba Postu Kelikai, maibe Xefe Suku utiliza fali karimbu foun neebe pertense ba Postu Kelikai Antigu.
Nia argumenta, tuir Divizaun Administrativa Territoriu, Suku Uaitame pertense ona ba Postu Kelikai Antigu, maibe seidauk klaru, no kontinua pertense ba Kelikai, tanba seidauk tama iha Diploma Ministerial.
“Momentu dia 22 Janeiru 2025 nee ami hasoru malu ho Diretor Jeral Desentralizasaun Governu lokal, no Prezidente Autoridade Munisipiu Baukau rasik mai ami dialogu katak, hahu ba oin tranzitoriamente komunidade Uaitame nia surat asina husi Senor Paul Jacinto Moreira,” Bartolomeu haktuir.
Nia akresenta, komunidade Uaitame rejeita hamutuk ho Postu Kelikai Antigu, tanba iha solusaun liu husi dialogu, neebe realiza iha Sede Suku Abafala, iha loron 22 Janeiru tinan nee, neebe autoriza husi Prezidente Autoridade Munisipiu Baukau no Diretor Jeral Desentralizasaun Governu Lokal nuudar reprezentante Ministru Administrasaun Estatal hodi deside no orienta komunidade Uaitame bainhira trata dokumentus ruma hodi hetan asinatura husi Administrador Postu Kelikai ho tranzitoriu.
Maibe hafoin rona orientasaun nee, Xefe Suku Uaitame la marka prezensa iha sede suku hodi asina dokumentus komunidade hodi kontinua ba iha Administrador Postu, tanba nee hakarak suspende kargu ba Xefe Suku Uaitame.
Enkuantu Xefe Suku Uaitame, Celestino Freitas Moreira hatete, atu suspende kargu Xefe Suku, tenke bazeia ba Lei, tanba eleitu ba Xefe Suku liu husi prosesu votasaun.
“Tenke bazeia ba lei, tanba tomada pose liu ona, hodi bainhira hau koalia ba sira, se mak atu keixa, prontu ba mak ita koalia,” nia tenik.
Komunidade hirak neebe hakarak suspende kargu Xefe Suku nee, tanba iha loron 12 Fevereiru 2025, Xefe Suku nee rasik deklara hikas, estabelese Postu Kelikai Antigu husi VIII Governu Konstitusional neebe klaru ona tuir Dizisaun Administrativa Territoriu no publika ona iha Jornal da Republika, iha loron 24 Maiu 2024 nunee komprende Divizaun Administrativa Territoriu lori Uaitame ba hamutuk Postu Kelikai Antigu.
(EST 1)
