BAUKAU, STLTIMORLESTE.com – Komunidade uma kain hamutuk 1.251 iha Suku Bahalara Uain, Postu Administrativu Vikeke Vila konsumu deit bee mota no bee posu.
Xefe Suku Bahalara Uain, Angelo N. Dos S.D.L Pinto esplika, antes nee parte SAS kanaliza ona bee moos ba komunidade sira iha Suku Bahalara Uain no ba Suku vizinhu Uma Uain Craik, maibe komunidade husi Suku Bahalara Uain utiliza deit tinan ida kanalizasaun bee moos refere, tanba fasilidade kanalizasaun ba komunidade Suku Bahalara Uain hetan estragus husi ema deskonhesidu, nunee kuaze tinan neen ona komunidade sira konsumu deit bee mota no bee posu.
“Iha Suku Bahalara Uain populasaun dez-araska ba bee, sira idak-idak ba dada iha mota ba sira nia uma no balun halo posu, iha Suku Bahalara Uain kuaze konsumu deit bee mota no posu,” informa Angelo ba jornalista STL liu husi telefone, Segunda (07/07/2025).
Nia sublina, bee husi mota neebe komunidade sira kanaliza ba idak-idak nia hela fatin kauze balun ho distansia Kilometru rua, maibe balun neebe laiha finanseiru sosa fasilidade atu kanaliza obrigatoriu tula ho motor kada loron hafoin utiliza ba nesesidade.
Enkuantu komunidade balun neebe laiha liu finanseiru no motor kee deit bee posu hodi konsumu, tanba distansia husi uma ba mota lao dook.
Nia argumentu, kestaun komunidade nia preokupasaun kona-ba bee moos, hanesan Autoridade Suku iha tinan 2023 aprezenta ona iha reuniaun Asembleia Postu Administrativu neebe konsege hetan ona aprovasaun iha nivel Munisipiu tuir planu atu halo perfurasaun bee moos no kanaliza ba komunidade sira, maibe too ohin loron seidauk akontese.
“Perfurasaun nee hodibainhira ami fo fatin ida iha bee Welaku, mota Wetutu no seluk tan, maibe seidauk pasti,” Angelo fundamenta.
Tuir Xefe Suku nee katak, konsumu bee mota no bee posu konserteza impaktu ba komunidade sira nia saude, tanba deskonfia kontaminadu, maibe agradese tanba durante nee komunidade sira seidauk enfrenta problema saude kona-ba konsumu bee refere.
Maibe husu ba parte relevante iha nivel Munisipiu no Nasional atu haree asuntu, tanba bee moos nesesidade importante ba komunidade sira atu asesu.
Entretantu Suku Bahalara rejistu Xefe familia hamutuk 1.251.
(tom)
