BAUKAU, STLTIMORLESTE.com – Komunidade hamutuk uma kain 101 iha Aldeia Umakerek, Suku Seiçal, Postu Administrativu Baukau Vila, Munisipiu Baukau seidauk asesu eletrisidade.
Informasaun nee hatoo husi Xefe Suku Seiçal, Agus Ferdinande Carvalho ba jornalista STL iha Seiçal, Sesta (09/01/2026)
“Kona-ba eletrisidade komunidade iha Aldeia Umakerek iha 101 familia oras nee daudaun seidauk asesu eletrisidade,” nia informa.
Nia katak, problema refere komunidade sira infante tinan naruk ona, tanba nee Autoridade Suku iha tinan 2025 submete ona pedidu ba Eletrisidade Timor Leste, Empreza Publiku (EDTL,EP) atu halo instalasaun fiu eletrisidade ba komunidade sira, maibe too ohin loron seidauk iha rezultadu.
“Proposta nee momentu ami diriji husi Suku 2 hamutuk ho Kaibada Makasae, tanba nia komunidade balu mos hela iha irigasaun Sobabere nian mos seidauk asesu, tanba nee ami husu haree moos ami nia eletrisidade ida nee,” Agus informa.
Nia katak, durante tinan naruk nia laran komunidade sira utiliza deit lampu trandisional, lampra no seluk tan iha tempu kalan hafoin hetan naroman, maibe difikulta tebes komunidade sira, tanba lampu trandisional hanesan lampurina la fasilita labarik estudante sira atu utiliza ba estuda iha tempu kalan no lampra la garante atu utiliza too oras ida ho balu.
Nunee husu EDTL,EP atu konsidera pedidu neebe suku submete ona, tanba pedidu refere nuudar pedidu preokupasaun komunidade nian atu halo instalasaun fiu eletrisidade ba uma komunidade sira nian iha area refere.
Liga asuntu nee STL tenta konfirma responsavel EDTL,EP Munisipiu Baukau, maibe laiha fatin atu fo komentariu.
Entretantu Suku Seiçal rejistu komunidade hamutuk uma kain 624.
Reportajen: Tomas Reis
