ERMERA, STLTIMORLESTE.com – Komunidade uma kain 15 iha Suku Leimea kraik, Postu Administrativu Hatulia A, Munisipiu Ermera, too oras nee seidauk asesu ba ahi eletrisidade.
Kestaun nee hatoo husi Xefe Suku Leimea Kraik, Patriciano Aroujo ba jornalista sira iha nia knaar fatin Suku Leimea Kraik, Postu Administrativu Hatulia A, Munisipiu Ermera Sesta (17/10/2025).
Nia hatete, iha suku refere dezde uluk too mai agora seidauk asesu ba ahi eletrisidade.
“Liga ba eletrisidade iha suku ida nee, ita foin estabelese ka ahi foin tama iha suku ida nee iha tinan 2022, fulan Dezembru agora ba ona tinan 3, durante nee aldeia 2 mak seidauk asesu mak aldeia Laquiama no ida tan maibe agora iha ona prosesu konstrusaun, hau nafatin ezije ba kompanhia ida neebe mak uluk sai manan nain ba iha instalasaun ba lina eletrisidade mai suku ida nee, tanba nee agora hahu prosesu harii besi riin sira nomos sira promete katak iha fim do ano ida nee sira tenke termina. Iha uma kain 15 iha Aldeia Gunutur mak seidauk asesu ba lina eletrisidade, maibe hau fiar katak husi ami nia esforsu sira ho ministeriu relevante sira nia esforsu bainhira too fin do ano, ida nee finaliza,” katak nia.
Iha biban nee nia mos husu Governu liu husi Ministeriu relevante tuun ba terenu hodi haree direita kompanhia sira neebe mak oras nee dada hela ahi eletrsidade ba komunidade sira nia uma, presiza identifika tanba iha kauza balun neebe presiza haree, tanba dala ruma kompanhia mai halo tuir sira nia hakarak deit.
“Ezemplu besi riin sira iha kraik tidin hela iha area risku sira, tanba nee lo-loos parte tekniku EDTL bele mai haree took fatin sira hanesan nee merese duni ka lae? keta halo komunidade uza la too tempu naruk ai-riin sira nee estraga husi mota, ida nee mos estadu nafatin gasta osan,” dehan Xefe Suku.
Komunidade uma kain 15 neebe la asesu ba ahi eletrisidade nee hetan apoiu solar painel ruma husi Governu ka lae? Hatan ba kestaun nee Xefe suku hatete, uluk 2014 ou 2010 komunidade sira hetan solar painel maibe nee uluk liu ona, maibe husi 2020 sae mai too ohin sira la hetan apoiu ruma.
“Husi 2010 – 2014 nee sira hetan apoiu solar painel maibe husi 2020 too mai ohin loron sira la hetan apoiu ruma, too agora sira sei uza solar painel ida uluk nee, tanba nee sira kestiona tanba saida ema aldeia seluk ahi eletrisidade tama ona maibe tanba saida ami uma kain 15 la hetan, ho razaun neebe kompanhia hatete katak sira mai harii ai-riin momentu nee uma seidauk harii, no uma kain 15 nee iha bairu foun ida tanba nee dezenhu BOQ la too iha neeba,” katak nia.
Nia hatete, nuudar aman ba suku nee nafatin ezije ba Governu liu husi Ministeriu relevante bele tau matan hela ba komunidade sira nia preokupasaun nee, nunee komunidade uma kain 15 mos bele asesu ahi eletrisidade hanesan mos ho komunidade seluk.
Suku Leimea kraik, kompostu husi aldeia 3 mak hanesan Hatupae, Laquiama, Gunutur, no total uma kain hamutuk 400 kompostu husi feto 865 no mane 941, total habitante 1.806.
Jornalista: Emerenciana Pinto
Editor: Xisto Mendonça
