DILI, STLTIMORLESTE.com – Komunidade uma kain 96 husi Suku Afaloicai, Postu Administrativu Uatulari, Munisipiu Vikeke dezde ukun aan too ohin loron seidauk asesu ba ahi eletrisidade.
Kestaun nee hatoo husi Cejario Nasimento Pires Nuudar Xefe Suku Afaloicai, husi Postu Administrativu Uatulari, Munisipiu Vikeke ba jornalista STL liu husi telefone, Segunda nee (23/06/2025) hatete, ninia populasaun uma kain 96 mak too oras nee seidauk asesu ahi eletrisidade tanba hela dook husi linha eletrisidade.
Xefe Suku dehan, komunidade uma kain 102 seidauk asesu ba ahi eletrisidade hotu, maibe obra komesa lao ona husi Aldeia Haekiri, lao ona maibe seidauk finaliza, nunee husi aldeia husi Buibele no Lena, Kaisabalata komesa lao ona maibe seidauk finaliza, komunidade neebe hela dook husi linha eletrisidade, aldeia kiik ida Lena nia hela iha Diribu nee mak seidauk.
‘Tuir dadus neebe akumulativu neebe hau foti nee iha uma kain 96 mak seidauk, husi 96 nee balun neebe hela dook husi linha eletrisidade uma rua tolu hela dook tiha, maibe husi uma kain 41 hela hamutuk Diribu nee seidauk asesu nunee mos uma kain balun iha Haekiri hetan ona, no Borubai hetan ona, maibe husi uma kain 96 Governu seidauk iha inisiativu atu dada eletrisidade nee seidauk maibe uma kain seluk hetan ona,” katak Xefe Suku Afaloicai.
Xefe Suku hatete, husi uma kain 102 iha Aldeia Haekiri, Borubai sei iha prosesu nia laran, tanba kontrusaun dada ahi eletrisidade lao hela iha fulan Agostu ou Setembru nia laran bele asesu ona ahi eletrisidade maibe uma kain 96 nee mak seidauk asesu total, tanba dook husi ai-riin eletrisidade.
Iha biban nee Xefe Suku dehan, komunidade husi uma kain 96 neebe la asesu ba ahi eletrisidade tanba hela dook husi ai-riin eletrisidade, tanba nee alternativu ida mak Xefe Suku husu ba Governu atu apoiu solar panel nunee bele tulun komunidade liu-liu labarik sira bele uza estuda.
“Ida la asesu nee hau hatoo ona proposta ba iha sira neebe hela dook nee, uluk hau halo proposta ida husu Tenaga Surya para bele augenta tanba sira nee difikulta, tanba hela dook husi linha eletrisidade,” katak Xefe Suku.
Xefe Suku hatete, proposta nee autoridade lokal hatoo ona ba iha Governu maibe too oras nee seidauk hetan apoiu ruma ba ninia populasaun.
Iha biban nee nia nafatin husu ba Governu liu husi ministeriu neebe tutela iha linha eletrisidade bele buka solusaun ruma ba komunidade neebe too oras nee seidauk asesu ba iha ahi eletrisidade.
“Husu ho haraik aan karik bele ajuda hau nia komunidade neebe hela dook husi ai-riin linha eletrisidade, Governu bele buka alternativu seluk ida nunee bele hetan direitu hanesan mos sira neebe asesu ona ahi eletrisidade, tanba komunidade uma kain 96 nee hela iha nia rai moris fatin dook husi linha eletrisidade, tanba nee dala ida tan hau sujere ba Governu karik bele buka netik dalan alternativu bele hetan apoiu ruma hanesan Tenaga Surya nunee sira mos bele hetan netik naroman,” katak Xefe Suku.
Autoridade Lokal dehan, komunidade uma kain 96 difisil tebes atu asesu ba iha ahi eletrisidade tanba hela dook husi ai-riin eletrisidade, no uma kain 3 ka 4 hela besik malu Governu atu dada eletrisidade ba maibe kalkula orsamentu boot tanba nee labele dada ahi ba, karik bele apoiu netik solar panel ba sira nunee sira bele asesu iha naroman.
Iha Suku Afaloicai iha aldeia 10 kompostu husi Aldeia Dacuate, Uaicai, Osocaiwa, Lari, Buibela, Lena, Watu-Ita, Caitao, kailake, Lorosae, no total populasaun 6.272.
(eme)
