DILI, STLTIMORLESTE.com – Komunidade neebe hela iha Suku Zulo, Postu Administrativu Zumalai, Munisipiu Kovalima, hadau malu bee moos iha tempu kalan, tanba tinan ida resin sira la asesu ona bee torneira neebe ofrese husi SAS.
Lia hirak nee hatoo husi Xefe Suku Zulo, Marito Barros liu husi telefone iha Kovalima ba STL, Domingu nee (27/10/2024).
“Ami iha Zulo Knua kontinua hadau malu bee moos iha tempu kalan, tanba agora tempu bailoron bee posu tolu nee mak uza ba hemu, tein no fase ropa, maibe bee posu tolu nee ami tenke hadau malu iha tempu kalan, tanba loron nee bee maran ona, uluk ami asesu ba torneira, maibe bee refere kuaze tinan ida resin ami la asesu ona bee torneira, tanba uluk nee dada husi Lepo mak mai iha ami nia knua,” dehan Marito.
Nia dehan, bee matan neebe besik iha sira nian hela fatin nee uza bidon deit, bainhira nakonu mak sira ense iha jeregen no bee posu rua seluk nee sira uza ba fase ropa no haris, maibe kuandu bee posu ida besik sira nia uma nee ema hadau malu mak maran, nee posu rua seluk tenke uza ba hemu, fase ropa no haris.
“Uluk bee torneira sei sai nee ami uza mangera mak dada mai too iha ami nian uma oin, maibe bee torneira nee la sai dezde iha fulan Julhu 2023 too agora, neebe kuaze tinan ida resin ona ami la asesu bee torneira,” nia deklara.
Nunee mos Justina Cardoso hanesan komunidade Suku Zulo hatete, bainhira udan nee sira la hadau malu bee, maibe bailoron nee bee araska, tanba bee torneira nee sai dezde iha tinan kotuk, no durante nee sira uza deit bee posu tolu neebe antes nee sira uza ona.
“Bainhira udan nee ami la hadau malu bee, maibe bailoron nee bee araska, tanba bee torneira nee sai dezde iha tinan kotuk no duramte nee sira uza deit bee posu tolu, neebe antes nee sira uza ona,” tenik nia.
(jac)
