DILI, STLTIMORLESTE.com – Relasiona ho Edifisiu Tribunal Judisial Primeira Instansia Dili (TJPID) neebe luan tebes, oras nee daudaun iha deit Autoridade Seguransa Polisia Nasional Timor Leste (PNTL) nain rua (2) mak kontrola, iha planu komunika ho Komandante Jeral PNTL atu bele aumenta tan numeru PNTL hodi reforsa seguransa iha fatin nee.
Tuir Juiza Administradora Tribunal Dili, Edite Palmira katak, Tribunal iha Polisia nain rua neebe hein iha edifisiu laran, maibe haree katak area nee luan tebes presiza duni seguransa, kompara ho Tribunal tuan neebe kiik hela.
“Iha ona planu atu reforsa seguransa, iha ona komunikasaun ba iha Komandante Jeral atu reforsa liu tan seguransa Polisia sira neebe sei prezente iha edifisiu nee, ami bele husu too lima, maibe depende sira bele disponibiliza hira mak mai husi Komando Jeral,” dehan Edite ba jornalista sira iha Tribunal Dili, Kinta (03/04/2025).
Nia hatutan, julgamentu neebe lao iha Tribunal loke ba publiku, tanba nee publiku sira bele asiste. Maibe iha krimi balu mak labele asesu, tanba dignidade ema nian, vida pesoal Juiz bele limita, maibe maioria krimi publiku bele asiste.
Reforsa tan, ba oin publiku sira neebe hakarak akompanha julgamentu bele tama iha Tribunal hodi akompanha, maibe sei liu husi portaun entrada hodi prienxe lista neebe iha.
Iha fatin ketak, Akademiku UNTL Rafael de Jesus dehan, reforsa seguransa iha Tribunal, atu nunee labele akontese tan hanesan situasaun balu neebe antes nee akontese.
“Edefisiu Tribunal fatin neebe ema iha neeba hodi buka justisa, tanba nee presiza mos iha kontrola ba fatin nee husi autoridade seguransa sira,” dehan nia.
Nia hatutan, asaun neebe foin lalais akontese iha fatin nee ladun diak, ba oin husu seguransa atu kontrola fatin nee, tanba sai hanesan fatin neebe ema ba buka Justisa, atu labele mosu tan hanesan situasaun balu liu ba nee.
Tuir observasaun STL nian, antes nee iha desizaun Tribunal nian ba matebian Zizelma hamosu dezentendimentu iha edefiisu oin too kauza feto ida hetan kanek.
(ter)
