DILI, STLTIMORLESTE.com – Relasiona ho loron boot 28 Novembru, kondenadu sira neebe hakarak hetan indultu hatama pedidu ba iha Ministru Justisa haruka ba iha Prezidente Republika, hodi desidi kona-ba atu hetan indultu ka lae.
Tuir Diretor Prizaun Gleno, Cristiano Salsinha katak, oras nee daudaun prizaun Gleno iha kondenadu hamutuk 112. Husi numeru neebe iha, iha kondenadu hamutuk nain 15 mak hatama pedidu atu husu indultu, maibe agora husi prizaun seidauk simu karta ruma, hodi serteza Prizaun Gleno dadur hira mak hetan indultu.
Ita hatama pedidu, maibe too agora ita seidauk hetan serteza ba numeru hira mak husi Prizaun Gleno hetan indultu, lista pedidu hatama kondenadu nain 15 ba sira neebe vulneravel tebes, maibe too agora seidauk hatene prizaun Gleno hira mak hetan indultu,” dehan Diretor nee ba STL liu husi telefone, Domingu nee (01/12/2024).
Nia hatutan, kondenadu sira neebe hatama pedidu hodi husu indultu, balu kumpri ona sira nia kastigu durante tinan 9, balu tinan 10, balu tinan 6, no sira kumpri ona metade de pena, tuir regra sira hakarak hetan indultu, bele hatama pedidu, maibe kompetensia iha Prezidente Republika mak sei desidi.
Nia esplika, kona-ba kondenadu neebe uluk hanesan Padre iha Oekusi Ricard Daspah, antes nee iha Prizaun Bekora, depois halo pedidu ba iha Ministru, muda ba iha Prizaun Ermera.
Nia mos tama iha lista pedidu neebe hatoo kondenadu hamutuk nain 15, inklui mos Ricard Daspah,” dehan nia.
Nia hatutan, too agora sira seidauk hetan karta balu husi Tribunal, Prokurador, nomos Gabinete Prezidente Republika, kona-ba pedidu refere.
Nia sublina, kondenadu sira mak halo rasik pedidu no Guarda sira halo deit avaliasaun kona-ba sira nia hahalok neebe iha Prizaun.
(ter)
