BAUKAU, STLTIMORLESTE.com – Edifisiu Eskola Ensinu Baziku Filial primeiru segundu siklu Lacoliu iha Postu Administrativu Kelikai, Munisipiu Baukau, sai preokupsaun ba estudante sira iha tempu udan, tanba kondisaun eskola aat ka la diak.
Koordenador Eskola Ensinu Baziku Filial Lacoliu, Julio Caetano Freitas informa, EBF Lacoliu rejistu estudante ba anu letivu 2025 hamutuk nain 130 kompostu primeiru too sestu anu, maibe sala ba estudante hamutuk 4 no dadaun kondisaun ameasadu, tanba ai grabat neebe eziste hahu laok hodi fo ameasa ba profesor no estudante iha tempu udan no anin boot.
“Ami nia sala 3 deit mak diak, maibe sala ida ami profesores uza tiha ba eskritoriu, sala 2 deit mak prosesu aprendizajem lao ba oin, maibe sala seluk agora aat total. Uza maibe kuandu udan anin boot entaun prosesu aprendizajem la lao alunu sira nee ami haruka fila ba uma, tanba sala estraga nia kuda kuda aat, entaun ami salva alunu sira labele hetan dezastre,” hateten Julio Caetano ba jornalista sira iha Lacoliu, Kinta (29/08/2025).
Nia sublina, bainhira prosesu aprendizajem lao mak derepente mosu udan no anin boot, profesores obrigatoriu haruka fila estudante sira ba uma, tanba infraestrutura sala 4 neebe eziste la garante ba estudante sira nia vida.
Nia fundamenta, kondisaun infraestrutura sala ba estudante nian neebe durante nee kondisaun aat hodi difikulta prosesu aprendizajem iha tempu udan no anin, parte eskola relata ona ba Ministeriu Edukasaun liu husi Servisu Munisipal Edukasaun Baukau atu solusion, maibe seidauk iha rezultadu.
“Ami hatoo ba Ministra Edukasaun bele hanoin netik eskola Ensinu Baziku Filial Lacoliu nian, tanba kondisaun eskola aat liu prosesu aprendizajem la duun diak ba profesores no alunus hotu hotu prosesu aprendizajem la duun lao,” Julio rekomenda.
Aman estudante José Maria Belo Soares sente triste ho kondisaun eskola EBF Lacoliu, tanba kondisaun aat no la seguru ba estudante sira nia prosesu aprendizajen.
“Eskola EBF Lacoliu nee haree grave tebes, tanba tempu udan ou anin boot estudante iha nee sala 4 profesores sira haruka fila, tanba kondisaun mak didin ho kalen janela sira aat hotu la duun seguru ba estudante sira nia prosesu ensinu,” José komenta.
Nia mos husu Ministeriu Edukasaun atu solusiona kondisaun sala ba estudante sira hamutuk 4 iha EBF Lacoliu neebe dadaun kondisaun ameasa ba estudante sira iha prosesu aprendizajem, tanba iha tempu udan no anin boot difikulta estudante sira tuir prosesu aprendizajem no obrigatoriu fila ba uma.
Hatan ba kestaun nee, Diretor Servisu Munisipal Edukasaun Baukau, Afonso dos Santos da Costa hateten, kona-ba kondisaun eskola EBF Lacoliu neebe dadaun aat parte tekniku halo ona levantamentu dadus submete ona ba Ministeriu no sei responde, maibe depende ba Ministeriu nia dezisaun, tanba sei responde uluk kondisaun eskoka neebe konsidera prioridade halo reabilitasaun bazeia ba numeru estudante.
“Ita iha ona dadus depois submete ida neebe mak prioridade nee orsida Ministeriu haree implementa iha neebe. EBF Lacoliu ita sei haruka ekipa ba haree maske sala balun iha neeba aat ona mais ita haree kuatidade estudante ida neebe prioridade ita tenke halo duni,” Katak Afonso.
Tuir observasaun neebe jornalista STL nota iha terenu sala ba estudante hamutuk 4 neebe dadaun kondisaun aat, mak hanesan sala 1 harii husi inan aman estudante neebe didin ho kalen haleu, maibe la seguru no sala 3 nuudar infraestrutura husi Indonezia nian neebe sala 1 tomak laiha janela no odamatan inklui ai grabat sira laok no dodok, enkuantu sala 2 seluk iha odamatan, maibe laiha janela neebe parte eskola taka ho kalen no ai grabat kondisaun aat.
Entretantu Eskola EBF Lacoliu rejistu estudante anu letivu 2025 hamutuk nain 130 kompostu primeiru anu nain 25, segundu 28, terseiru 24, kuartu 13, kintu 24 no sestu anu nain 16 ho total profesores ativu nain 8 no nain ida dadaun naran tama lista reforma.
Jornalista: Tomas Reis
Editor: Carme Ximenes
