KELIKAI ANTIGU, STLTIMORLESTE.com – Estrada husi Postu Administrativu Kelikai Antigu ba Suku Abafala, Postu Kelikai, Munisipiu Baukau, daudaun nee difikulta movimentasaun transporta publiku no privadu labele asesu, tanba kondisaun aat.
Rezidente Euofa, Suku Namanei Adelino João informa, estrada diresaun husi Suku Afasa ba Abafala durante nee sai dalan alternativu ba komunidade sira husi Suku Afasa no Namanei asesu hodi ba Postu Administrativu Kelikai bainhira iha nesesidade kona-ba tratamentu dokumentus iha Parokia Santa Terezinha Kelikai, maibe durante nee difikulta tebes komunidade sira nia movimentu, tanba la fasilita komunidade sira utiliza transporte hodi liu husi dalan refere.
“Ao mesmu tempu ami ba Parokia Kelikai halo sertidaun ruma liu mota boot liu mos araska liu mota tolu hanesan nee,” hateten Adelino ba jornalista STL iha Kelikai Antigu, Kuarta (03/09/2025).
Nia sublina, komunidade sira nia asesu ba estrada diresaun husi Suku Afasa too Abafala fo risku ba sira nia vida, tanba hakur mota 3, maibe komunidade sira tenke asesu husi dalan nee hodi too Igreja Parokia Santa Terezinha Kelikai hodi trata dokumentus hanesan sertidaun no seluk.
Tanba nee husu Ministeriu Obras Publikas atu tau estrada diresaun husi Afasa ba Abafala nunee bele fasilita komunidade sira, tanba iha tempu udan fo risku ba komunidade sira nia movimentu bainhira asesu estrada refere.
Iha sorin seluk Xefe Suku Afasa, Joaquim Fernandes Ximenes hateten, estrada husi Postu Administrativu Kelikai Antigu ba Postu Kelikai neebe diresaun liu husi mota Ukamuni too Suku Abafala nuudar dalan alternativu ba komunidade sira husi Suku Afasa, Namanei inklui Gurusa ba Postu Kelikai besik liu, maibe difikulta movimentasaun, tanba kondisaun aat no akur mota.
Nunee husu Ministeriu Obras Publikas fo atensaun liu husi reabilitasaun, tanba Suku 3 hanesan Afasa, Namanei inklui Gurusa sai ona Postu ketak iha Munisipiu Baukau, maibe konsdisaun estrada maioria grave.
Hatan ba kestaun nee, Diretor Servisu Munisipal Obras Publikas Baukau, Agostinho Ximenes rekoinhese, estrada diresaun husi Postu Kelikai Antigu ba Postu Kelikai neebe nia diresaun liu husi mota Ukamuni akur mota 3 no dadaun nee kondisaun grave, nunee kondisaun sira submete ona ba Nasional atu fo atensaun.
“Kona-ba estrada nee antes nee nia tipe rural, maibe sai ona Postu foun entaun ida nee ita kategoria ba estrada Munisipal, tanba kondisaun estrada rural ita enkamina ona, maibe muda ona nia tipe ba estrada Munisipal, entaun diresaun Nasional mak iha direitu bele mai foti dadus foun,” katak Agostinho.
Diretor nee afirma, estrada diresaun husi Dailari Tekinomata ba Postu Kalikai Antigu no husi Kelikai Antigu ba Postu Kelikai nia estatutu muda ona ba estrada Munisipal nunee kondisoens sira parte Nasional mak iha kompetensia atu fo solusaun.
Jornalista: Tomas Reis
Editora: Carme Ximenes
