BAUKAU, STLTIMORLESTE.com – Estada rural ba Suku Makalaku, iha Postu Administrativu Kelikai, Munisipiu Baukau, daudaun nee grave tebes.
Tuir observasaun STL nian iha terrenu nota katak, estrada rural ba Suku Makalaku husi estrada nasional diresaun Baukau-Kelikai, iha Aldeia Lawaliu, Suku Baguia, Postu Kelikai, daudaun kondisaun aat no grave, tanba seidauk halo reabilitasaun.
Iha konfirmasaun, Xefe Suku Makalaku, Estevao Salamao Martins Belo rekonhese, udan neebe monu rai ona fo impaktu tebes ba movimentu transporte publiku no privadu, tanba estrada refere rai manu teen neebe tempu udan namdoras, hodi difikulta transporte labele halo movimentu.
“Hanesan estrada ita hatoo ona pedidu ba planu annual 2025, maibe ita nia orsamentu jeral neebe koloka mai munisipiu ba infraestrutura nian kiik, entaun ita adianta ba 2026,” informa nia ba jornalista sira iha Makalaku, Kinta (05/12/2024).
Nia argumenta, kondisaun estrada refere parte suku esforsu no aprezenta ona liu husi pedidu ba planu asaun annual 2025 munisipiu nian, maibe orsamentu 2025 neebe aloka ba Autoridade Munisipal ba programa infraestrutura la sufisiente atu responde.
Hatan ba kestaun nee, Prezidente Autoridade Munisipiu Baukau, Veneranda Lemos hateten, sei buka meius hodi responde, maibe fazeadamente, tanba problema infraestrutura baziku sei barak neebe Autoridade Munisipiu atu atende.
(EST 2)
