BAUKAU, STLTIMORLESTE.com – Sarani Parokia Kelikai preokupa ho kondisaun Igreja Santa Terezinha iha Suku Lakuliu, Postu Administrativu Kelikai, Munisipiu Baukau, tanba ameasadu atu monu.
Deklarasaun nee hatoo husi Sarani Mario Fonsiano dos Santos ba jornalista sira iha Suku Lakuliu, Sesta (08/11/2024)
“Kondisaun fizika neebe agora daudaun iha, tama ba risku monu nian, ami la hatene saida mak ami atu bele halo hodi asegura fila fali kondisaun igreja nee, daudaun ita haree alis tiha ona,” nia dehan.
Igreja Santa Terezinha tuir Mario, konstrui iha tinan 2006 tempu Padre Parokia João de Deus, neebe too iha tinan 2016 ba 2017 estrutura rai hahu book aan, rezulta eskada no moru protesaun sira nakfera hodi fo ameasa ba kondisaun uma igreja hahu alis iha tinan 2021 too agora.
Mezmu kondisaun fiziku Igreja nian fo ameasa ba sarani sira iha tempu misa Domingu no selebrasaun misa seluk tan, maibe la hamate vontade fiar kristaun katolika hodi nafatin utiliza igreja refere haklaken fiar, tanba laiha fatin seluk atu utiliza ba misa sira.
“Nuudar sarani ita nia kontribuisaun hakarak hadia, maibe posibilidade kondisaun hanesan neeba uza deit ami sarani nia forsa nee labele,” Mario hateten
Tanba nee, hanesan sarani Katolika pertense ba Igreja Santa Terezinha nia sente triste ho kondisaun refere, no nia prontu atu kontribui osan tuir kbiit hodi rekupera hikas kondisaun Igreja, maibe prezisa planu husi parte Parokia no Diozese.
Nunee nia sujere, parte Parokia no Diozese presiza tau atensaun seriu ho sedu, tanba tempu udan hahu ona, maibe kuandu tarde, polisibilidade Igreja bele monu, tanba laiha bee dalan hodi fasilita udan been sulin sai, maibe nalihun deit iha laran neebe fo impkatu makaas liu tan ba moru protesaun aumenta nakfera no monu.
Entretantu Padre Parokia Santa Terezinha Kelikai, Justiniano de Sousa rekonhese, kondisaun Igreja refere book aan ona, tanba iha area parte Uma Igreja ninin sira hahu monu iha tinan hirak liu ba, nunee parte Parokia halo ona reabilitasaun dala 2, maibe kontinua monu.
Nunee Parokia foti dezisaun hodi bolu pesoal tekniku enjinering Timoroan balun halo estudu analiza, neebe nota katak, iha fatin konstrusaun iha kadas bees moris fatin no rai hirak antes nee ateru ba fatin refere, la pres ho diak hodi monu fo ameasa ba Uma Igreja.
“Esforsu ida agora ami halo hela negosiasaun ba eskavator mai kee, hodi silindru bele sama fila fali haleu igreja, depois mak fui fali, atu nunee kanaliza fali bee tuir nia dalan labele fo impaktu boot ba iha Igreja,” hatete Padre nee.
(EST 2)
