DILI, STLTIMORLESTE.com – Previzaun tempu ba loron ohin, Sesta (20/02/2026), kondisaun tempu ohin fo atensaun espesial bá udan ho intensidade moderadu ka naton (10 mm/dia) ba forte (~20 mm/dia) kuaze iha territoriu nasional.
Liu husi informasaun neebe STL sita husi pajina offisial rede sosial Diresaun Nasional Meteorologia no Geofisika (DNMG) Sesta nee hatete, Ministeriu dos Transportes e Comunicações (MTC) liu husi DNMG hakarak informa ba publiku katak, instabilidade atmosferika ba loron ohin, sei intensifika liu akompanha ho prezensa fenomeno meteorolojiku hanaran: (Madden Julian Oscilation “MJO”) iha neebe sei kontinua persiste favorese udan ho intensidade moderadu/naton ba forte, kuaze iha territoriu Timor laran tomak, tantu iha rejiaun kosteiras /tasi ibun kuantu iha rejiaun foho, durante periodu lorokraik ba inisiu kalan.
Entertantu atensaun ba velosidade anin iha rejiaun kosteiras prinsipalmente iha Kosta Norte no Leste, liu-liu iha munisipiu sira hanesan:(Atauro, Baucau, Manatuto no Lautem).
Velosidade anin ba loron ohin sei varia husi moderadu/naton (16-20 km/h) iha munisipiu sira neebe mensionadu ona iha leten, enkuantu restante munisipiu sira seluk iha territoriu nasional, velosidade anin sei normal (7-15 km/h). Enkuantu laloran tasi nia aas ba loron ohin, sei varia husi normal (0.3-0.8 m) iha Kosta Norte, exceptu iha Kosta Sul mak kondisaun refere sei varia husi normal ba moderadu,/naton (0.7-1.2 m).
(dom)
