DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial AFS, tanba komete krimi hasoru lezadu ho inisial HS.
Iha sala julgamentu laran Juiz prosesu Jumiati Freitas lee sai akuzasaun neebe iha katak, iha loron 17 fulan Novembru tinan 2022, haleu oras 15h30 iha Zita Plaza Komoro nia oin, lezadu konduz mikrolet ida husi Diresaun Komoro atu ba tula pasajeru sira iha Bidau.
Banhira too.iha Zita Plaza nia oin arguidu kaer hela tudik ida ho medida 0,39 cm ho nia naruk 3cm imediata hapara mikrolet nee, no tama ba iha kareta laran lori kedan tudik sona iha lezadu nia kotuk laran dala ida, kabas dala ida no hirus matan dala ida.
Konsekuensia husi arguidu nia hahalok nee halo lezadu sente moras no raan sai barak.
Tanba nee, Ministeriu Publiku akuza arguidu komete krimi Ofensa Integridade Fizika Grave neebe previstu iha artigu 146, no krimi Arma Branka lei numeru 05/2017 iha loron 19 fulan Abril.
Iha sala julgamentu laran arguidu deklara katak, momentu neeba arguidu konduz hela kareta bemo no lezadu mos konduz kareta ida, no kareta neebe lezadu konduz soke kareta neebe arguidu konduz nia espelu, tanba nee arguidu mos hapara tiha kareta lezadu nian, maibe lezadu tun husi kareta la koalia didiak tuku kedan arguidu.
Arguidu deklara, razaun lezadu tuku arguidu mak momentu neeba arguidu deside fila fali mai uma foti tudik ida hodi ba hein lezadu iha Zita Plaza nia oin.
Arguidu deklara, banhira lezadu ho kareta liu, arguidu mak hapara sai ba iha kareta laran, lori tudik sona lezadu dala tolu.
Arguidu deklara, razaun sona lezadu tanba deit lezadu baku arguidu. No lezadu mos konfirma, lori duni tudik sona lezadu kuak tolu, tanba arguidu ho emosaun.
Arguidu mos deklara, buka lezadu atu rezolve tuir familia, maibe lezadu dehan seidauk iha tempu, ho nunee arguidu hein too agora la iha solusaun.
Rona tiha deklarasaun arguidu nian, Tribunal adia ba loron seluk hodi rona deklarasaun husi lezadu.
Audensia julgamentu nee prezide husi Juiz Koletivu, Jumiati Freitas, Jose Gonsalves, Jose Quintao, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Jose Maria Guterres.
(ter)
