DILI, STLTIMORLESTE.com – Primeira Konferensa Jeral ba kuadru Juventude FRETILIN ho nia tema, hametin Koezaun Interna, “Haburas Aliansa ho Massa”.
“Konferensa Jeral kuadru Partidu FRETILIN nian nee objetivu atu halo analiza ba situasaun ohin loron, hodi haree realidade foin sae nian no organizasaun sira nian, nivel externo haree realidade ita nia rain foin sae sira, iha nivel interno haree kona-ba Juventude FRETILIN nia problema, oinsa Juventude FRETILIN hanesan espasu ida, bele reprezenta aspirasaun hotu-hotu nian neebe bele lori ba partidu politiku FRETILIN atu reflete desizaun politika no programa politika sira aban bainrua nian,” dehan Sekretariu Jeral Juventude FRETILIN, Abraão Saldanha ba jornalista sira iha Fatuhada, Sabadu (20/12/2025).
Nia hatutan, segundu trata kona-ba asuntu interna sira, hanesan re-estrutura no re-organizasaun juventude FRETILIN nian.
“Juventude sira neebe partisipa iha konferensa nee mai husi munisipiu too iha postu sira hotu. No fahe mos kovite hodi konvida juventude husi partidu sira seluk, maibe partisipa iha nee juventude husi partidu PLP deit,” nia esplika.
Nia dehan, hatoo ba iha Juventude FRETILIN atu hametin unidade interna, husu foin sae hametin unidade, deskobre solusaun ba problema, no lori ideia no solusaun sira ba iha poder politika liu husi partidu politiku nunee bele implementa iha programa partidu politiku nian.
Iha fatin hanesan, Sekretariu Jeral Partidu FRETILIN, Mari Alkatiri dehan, liu husi konferensa nee atu troka hanoin ba malu.
“Hau fiar katak konferensa jeral ida nee atu troka hanoin, fiar katak sei hetan espasu diak liu atu lao ba oin,” dehan nia.
Nia argumenta, revizaun ba estatutu ho objetivu klaru, atu jerasaun foun bele kaer ukun, iha revizaun estatutu sei halo orgaun ida hanesan konselu tranzisaun, orgaun ida atu jere plataforma.
Aleinde nee, Prezidente Partidu FRETILIN, Fransisco Gutrerres dehan, iha konferensa nee atu deskuti kestaun balu ligadu ho estrutura partidu FRETILIN.
“Iha fatin ida nee atu deskuti kestaun sira neebe ligadu ba iha estrutura juventude FRETILIN nian iha nivel nasional, buka atu hametin diak liu tan organizasaun juventude FRETILIN nian,” dehan nia.
Nia esplika, tema sentral neebe foti iha konferensa nee diak tebes, no parte sira neebe partisipa iha konferensa nee hamutuk nafatin hametin koezaun, tanba juventude FRETILIN hakarak hametin koezaun interna iha estrutura nia laran atu hakat ba oin.
Jornalista: Terezinha De Deus
Editor: Xisto Mendonça
