DILI, STLTIMORLESTE.com – Bankada FRETILIN iha Parlamentu Nasional (PN) konsidera konfiansa populasaun hahu mihis ba beibeik, tanba problema iha setor saude kontinua grave maibe Governu seidauk solusiona.
Deputada Bankada FRETILIN, Nurima Ribeiro Alkatiri hatete, konfiansa populasaun nian hahu mihis ba Governu, tanba problema neebe ikus-ikus nee akontese iha hospital kona-ba sistema saude, tanba Governu lakohi rekomendasaun husi Bankada FRETILIN durante tinan ida resin.
“Agora ita haree, ita nia populasaun barak mos ba hospital tauk ona, tanba dehan ba tauk mate, entaun diak liu mate iha uma, tanba konfiansa populasaun nia ba Governu lakon tan deit iha sistema saude,” hatete Deputada Nurima Ribeiro Alkatiri ba jornalista sira iha resintu Parlamentu Nasional, Segunda (14/04/2025).
Nia hatutan, problema iha setor saude hanesan preokupasaun neebe mak boot ba populasaun sira hasoru, tanba tasa mortalidade neebe boot tebes, tanba labarik barak, se Governu la konsege garante sistema saude neebe diak ba labarik sira, signifika Governu hanesan koondena populasaun atu moris iha susar nia laran.
“Situasaun ida nee grave tebes, laos foin mak grave maibe grave tinan ida resin ona, no grave tan deit loron-loron, wainhira ita haree kazu aumenta ema mate loron-loron, klaru ita hotu hatene katak mate nee ita hotu nia dalan ba neeba, maibe iha mos Maromak fo doutor no infermeiru sira, katak ita sei mate tuir ita nia loron duni. Laos mate tanba deit ita nia Governu lakohi garante rekursu atu ita nia sistema saude lao ho diak,” hatete deputada nee.
(alb)
