DILI, STLTIMORLESTE.com – Komunidade Devotu Jesus Mizerikordia selebra Solenidade Festa Jesus Divina Mizerikordia ba dala 9, Vigariu Episcopal Asuntu Pastoral Arkedioseze Dili, Padre Jovito Rego de Jesus Araujo husu ba sarani sira konfigurasaun Mizerikordia tenke lao iha ema nia moris, sarani sira presiza sai laran luak iha liafuan no hahalok sira, lolo liman atu tulun ema seluk.
Pe. Juvito esplika, festa ida nee São Paulo II estabelese formalmente iha uma kreda nia laran, fo revelasaun neebe Jesus halo ba Santa Faustina no devosaun nee ohin loron mak lao iha mundu neebe ema hotu sente no hakarak atu konfigura la fasil ida, Mizerikordia Maromak ninian nee komplikadu no difisil liu, ita ema inkonstante ita la permanente ida, muda beibeik tempu diak tempu aat no Mizerikordia nee nunka muda.
Devosaun Jesus Mizerikordia ida nee bele transforma ema atu sai laran luak, laran diak ba malu, hadomi malu ho neon ho laran, labele finzi labele hamnasa bosok-bosok, maibe laran nakali hela, labele halo kontrariu ba Mizerikordia kona-ba Maromak.
Maromak nia domin total nee iha ninia oan mane neebe hedi iha Kruz too mate, hanorin katak ema hotu hakarak tebes konfigura ho Maromak ninia Mizerikordia nee tenke hedi aan iha kruz mate ba ema seluk nia diak, mate ba lia loos, mate ba justisa, mate ba perdaun.
Tanba ohin loron ema barak la hatene perdua tan husu Jesus Miserikordia atu halo saida, festa Jesus Divina Mizerikordia fo hanoin fali ba sarani sira, Maromak hadomi ita katak Maromak hadomi ema maske oin aat oin la fase, hahalok aat sira Maromak hadomi nafatin ita, Maromak nia domin nunka muda, hau hanoin ida nee tulun sarani sira, labele devotu deit, labele ba reza deit koronka, maibe vida la koronka nee mos problema.
“Konfigurasaun Mizerikordia nee tenke lao iha ema, ohin ita selebra solenidade Jesus Divina Mizerikordia nee atu sarani sira presiza sai ema laran luak iha liafuan hahalok iha jestu sira, tenke ho liafuan, tanba Mizerikordia nee diak figura neebe lao, ilas neebe lao iha hau nia jestu sira liman neebé lolo atu tulun ema, hateke ema ho perdaun ho laran luak ibun neebe loke koalia lian neebe diak hamnasa, tilun neebe rona lia fuan la diak taka kalika ba espalha no konta vida no halo aat nee Mizerikordia lao iha ita sira nee nia leet,” hatete Pe. Jovito ba jornalista STL iha Igreja Imaculada Conceição de Balide, Domingu nee (27/04/2025).
Tanba nee husu ba sarani sira hotu-hotu selebrasaun loron Santu ida nee la too deit atu reza, maibe presiza halo orasaun nee lao iha ita nia moris, basa ita hahalok sai vida orasaun sai Mizerikordia iha ita nia moris.
Iha fatin hanesan, Devotu Jesus Divina Mizerikordia, Maria Margarida Moniz hatete, sente kontente tebes ba loron importante nebee ohin selebra festa Jesus Divina Mizerikordia, atu haklaken Jesus Mizerikordia ba ema neebe la hatene Jesus.
“Jesus Mizerikordia ita husu ho laran luak fo saida mak ita presiza fo, basa Jesus dehan husu sei fo, dere odamatan, odamatan sei loke,” dehan nian.
Atu selebra Festa Jesus Divina Mizerikordia antes devotu sira halo novena durante loron 9 iha Igreja Balide, hahu husi loron 18-26 Abril 2025, iha loron 26 Devotu Jesus Mizerikordia halao prosesaun husi Monumentu Nain Feto too iha Igreja Balide, nunee mos iha atividade oin-oin realiza hodi Festeza Jesus Divina Mizerikordia nian.
(joa)
