LIKISA, STLTIMORLESTE.com – Maizumenus tuku 4:30 OTL, Kuarta (01/01/2025) iha Kaitehu, Munisípiu Likisa, bainhira vizitantes sira halo paseu tinan foun 2025 nian ho familia iha tasi ibun, balu toka, kanta, dansa, han hamutuk, tunu naan, haris tasi, derrepente mosu konfrontu entre vizitantes hirak neebé ho kondisaun lanu iha fatin neeba tuda malu too raan sai, no estraga karreta 1 nia vidru rahun. Situasaun nee halo ema hotu paniku no tauk.
Antes tuda malu, fofoun sira hakilar no baku malu, halo vizitante hotu iha fatin neeba paniku no tauk, maibe konsege hakalma tiha husi maluk balu, maibe la too minutu 10 hanesan nee fatuk komesa tarutu ba mai iha fatin akontesimentu, hodi kona vizitantes balu nia karreta 1 vidru oin rahun, ho marka daihatsu grand max, numeru plat 38- 203 TL, no karreta 2 seluk estragus kmaan.
Akontesimentu nee rasik joven hirak neebé tuda malu, balu hetan kanek iha parte oin too raan sai. Situasaun nee halo ema hotu neebé iha fatin neeba sente tauk no triste, tanba sira atu haksolok tinan foun ho kontente, maibe teki teki situasaun mosu oin seluk fali, hodi halo sira hahu husi ferik, katuas no labarik sira halai ba mai buka fatin neebé seguru.
Situasaun nee rasik konsege hetan atuasaun husi parte seguransa PNTL no F-FDTL Munisipiu Likisa nian, hodi kaptura tiha joven hirak neebé halo barulhu iha fatin neeba.
Vizitantes Tisia Gomes, nuudar karreta sente triste ho hahalok husi vizitantes hirak neebé laiha moral hodi estraga ambiente neebé furak, bainhira ema hotu mai kontente ho sira nia familia mai paseu iha fatin nee.
Nia dehan, kuitadu tebes ho ema hirak nia hahalok nee, halo ema seluk sente tauk no sai vitima ba sira nia hahalok. Hanesan nain ba karreta neebé hetan estragus, nia parte sente triste duni, tanba hakarak ka lakohi tenke hasai fali osan hodi hadia sasan karreta nian neebé aat.
“Ho familia mai paseu iha fatin nee atu haksolok hamutuk tinan foun 2025 nian, mais iha ema balu neebé hanoin la hanesan, hakarak sobu no estraga suasana nee. Kuitadu los haree farik no labarik sira halai namkari buka fatin, tanba tauk. No pior liu tan, iha konfrontu nee tuda fali ema seluk nia karreta neebé nia nain rasik la hatene buka problema,” dehan nia.
Nia hatutan, nuudar nain ba karreta neebé hetan estragus, nia parte la halo keixa ou lori kazu nee ba oin. Tanba la haree ho matan se mak tuda, hodi haruka nia selu fali, maibe depois neineik mak hadia ou troka fali deit. Importante mak oan no familia hotu neebé hamutuk iha paseu nee, fila ho kondisaun diak hotu. Tanba sasan sei bele troka no hadia, maibe ema lae.
(dom)
