DILI, STLTIMORLESTE.com – Deskonfia joven sira husi Grupu Arte Marsiais (GAM) tuda malu besik iha Mesjid Kampung Alor nian, daudaun nee Polisia Nasional Timor-Leste (PNTL), Komando Dili halo ona indentifikasaun ba iha suspeitu sira neebe involve.
Komandante PNTL Munisipiu Dili, Superintendente Xefe Polisia Orlando Gomes, dehan, kazu konfrontu tuda malu entre joven sira deskonfia husi grupo arte-marsiais rua neebe seidauk hatene. Konfrontu nee akontese iha Domingo (28/09/2025) iha tempu kalan madrugada. Kazu konfrontu tuda malu nee rezulta sasan negosiante nia karosa 5 mak aat no taxi 1 mak ninia vidru tuda-rahun.
“Konfrontu nee akontese iha Kampung Alor besik Mesjid nia oin, iha Grupo joven parte rua mak tuda malu iha fatin neeba. Iha tuda malu nee rezulta ita nia karosa sira ema faan hahan etu kinur nian 5 mak hetan eestragus ho taxi 1 nia kotuk hetan tuda vidru rahun,” dehan nia ba Jornalista sira iha Kuartel PNTL, Kaicoli, Tersa (30/09/2025).
Orlando Gomes esplika, iha akontesimentu kazu konfrontu tuda malu nee parte autoridade seguransa polisia esquadra too kedas fatin hodi halo atuasaun normaliza hikas situasaun, nunee labele fo impaktu ba komunidade sira neebe hela besik iha area refere.
“Suspeitu sira nee ita indentitikadu hotu ona, tanba ita tun ba sira halai ses aan tiha ona, maibe ita indentitikadu hotu ona, hein deit halo operasaun para tun ba kaptura suspeitu sira”, nia informa.
Komandante nee deklara, ligadu kazu konfrontu nee parte vitima sira mos hatoo ona keixa ba komando munisipiu Dili hodi bele prosesa ba oin no buka tuir suspeitu sira neebe mak involve.
“Vitima hatoo ona keixa, ita komesa ona elabora prosesu nee, tanba suspeitu sira neebe involve ita identifikadu ona,” nia koalia.
Nia hatutan, Komando mos analiza hela situasaun iha terenu, hodi hatene sese mak involve iha konfrontu nee. Nune’e Komando bele trasa planu hodi halo operasaun tama iha Bairo-Bairo sira para kontrola labele iha perturbasaun ordem publika iha kapital Dili.
Jornalista: Jeniche da Costa
Editora: Domingas Gomes
