BAUKAU, STLTIMORLESTE.com – Konfrontu entre joven sira iha area Lekiloiwatu, Suku Triloka, Postu Administrativu Baukau Vila, Munisipiu Baukau, rezulta uma komunidade 4 hetan estragus, motor 1 hetan sunu no estragus 4 inklui sidadaun nain 2 kanek grave.
Komandante Polisia Munisipiu Baukau, Superintendente Xefe Polisia Antonio Maria De Sa esplika, konfrontu refere akontese iha loron 17 Novembru 2024 parte tuku 03:00 madrugada bainhira partisipa festa koremetan, maibe mosu konfrontu entre joven sira neebe deskonfia husi grupu arte marsiais, tanba provoka malu.
“Kuaze uma 4 hanesan nee, neste momentu nain 2 mak iha Hospital, motor kuaze 5 ida mak sira sunu tiha no balun halai hetan atake husi dalan,” hateten Komandante nee ba jornalista sira iha Vila Nova, Tersa (19/11/2024).
Nia sublina, uma 4 refere hetan estragus iha parte odamatan, janela no kalen, nunee mos sidadaun nain 2 neebe hetan kanek inklui motor 1 hetan sunu no 4 hetan estragus, tanba hetan tuda husi jovem sira neebe atake malu iha area refere.
Nia fundamenta, sasan hanesan motor ida hetan sunu no 4 estragus, laos komunidade sira neebe partisipa iha festa refere nee nian, maibe husi jovem sira neebe involve asaun nee rasik nia motorizada.
Komandante nee deklara, bainhira konfrontu refere akontese parte seguransa too kedas fatin hodi halo atuasaun no identifika ona jovem estudante ida ho inisial M nuudar autor prinsipal ba kazu refere no sei submete ba prosesu investigasaun, bainhira autor refere remata nia exame trimestral da-tolu.
Maibe parte Komando Polisia Munisipiu Baukau kontinua esforsu no hamutuk ho parte responsavel grupu Arte Marsiais sira atu identifika membru sira neebe involve iha konfrontu refere hodi submete ba prosesu investigasaun, tanba konfrontu refere involve joven membru arte marsiais 2.
(EST 2)
