DILI, STLTIMORLESTE.com – Madre sira husi Kongregasaun SSpS hamutuk ho Familia Ducurai Ermera, inklui Padre Madre no sarani sente triste tanba lakon Madre Maria da Graça Maia, SSpS neebe Nain bolu hikas ona iha Nai nia kadunan Santo.
Madre Maria da Graça moris iha Ducurai – Letefoho, iha loron 10 Julhu 1979, hanesan oan ba dahuluk husi maun alin nain 3, no Madre Maria da Graça, SSpS termina nia Caminada husi terra santa Timor Leste, hodi hahu pagina foun ba terra eternidade, iha Kinta, 19 Junhu 2025, exakto iha loron Solenidade Corpus Sangue de Cristo, iha Hospital Nasional Gido Valadares, Dili.
Iha biban nee Arsebispu Arkedioseze Dili, Dom Virgilio Cardeal do Carmo da Silva, SDB liu husi nia omilia iha Konventu Madre SSpS Hera Sabadu (21/06/2025) hatete, tinan ida nee bainhira selebra tiha festa paskua hodi hananu Aleluia Jesus moris hias, depois tuir mai Segunda feira tuir kedas tuku 3 dader oras Italia, no tuku 5 loraik oras TL rona notisia falesimentu Papa Francisco, no husi Papa Francisco nia mate sarani no povu Timor Leste sente triste ho saudades tanba fulan 6 depois nia vizita, sarani halerik tanba vigariu Kristu nia mate no Governu deklara lutu nasional semana tomak.
“Oinsa manifesta saudades la too fulan ida falta loron ida rua Arkedioseze Dili obrigadu hasoru tan laran susar ida Padre Domingos Maubere nia falesimentu, sentimentu tristeza seidauk liu molok tama fulan ida mos ohin ita halibur hamutuk atu despede Madre Maria da Graca, los duni nuudar ema ita laran susar, maibe nuudar ema fiar nain ita hakaas atu aprende tau ita nia laran metin ba Jesus nia moris hias,” katak Bispu.
Papa Francisco maske idade maibe iha loron ikus nia moras ita akompanha oinsa mediku sira luta atu salva nia vida maibe la konsege, nomos Padre Domingos Maubere no Madre Maria da Graça lo-loos sei bele servisu maibe perante moras maske esforsu oin-oin husi kongregasaun no familia halo maibe ikus mai forsa hotu la too atu salva.
“Maske ita sei presiza sira maibe obrigadu husik sentimentu ida nee mak iha hela sarani no komunidade sarani Dili nia lakon nia ema sira neebe ita dehan Zelu pastoral zelu minisionariu forte no makaas,” katak Bispu.
Madre Maria da Graça hatudu nia seriedade neebe hakmatek, tanba nia iha konfiansa tomak iha Maromak nia liman, tau nia aan tomak seriedade no ksolok neebe nia iha prova prosimidade liu-liu nia intimidade.
“Hanesan ita hotu hatene bainhira nia iis kotu iha dader festa Corpu Kristu nia, ninia intimidade ho Maromak mak lori nia atraveza nia kalvariu ho oin hamnasa,” katak Bispu.
Iha biban nee Visi Provincial TL, Madre Domingas de Deus Salsinha, SSpS hatoo agradese ba parte hotu neebe durante nee ajuda madre iha situasaun moras nia laran.
“Ba ita boot sira nia laran luak, orasaun, liu-liu bainhira rona Madre Maria da Graça ninia sofrementu sira nia terus sira, madre no padre sira halo orasaun ba nia, halo novena ba nia ho ita nia esforsu tomak ita hakarak madre da Graça hela ho ita maibe Maromak nia hakarak oin seluk, ba imi nia laran luak sira hotu ami hatoo obrigadu no agradese wain,” dehan Visi Provinsial TL.
Hatoo mos agradese ba ema laran luak sira hotu neebe buka tulun madre Maria da Graça iha prosesu halo tratamentu, agradese mos ba Governu Timor Leste liu husi Ministeriu Saude neebe fasilita madre hodi halo tratamentu iha Jakarta, no Malazia hahu husi tinan 2022 too 2024 no ikus 2025 dala ida tan hatoo agradese wain. No garadese mos ba parte hotu-hotu nia apoiu.
Madre dehan, matebian Madre Maria da Graça ema barak konhese diak se mak madre Maria da Graça, Madre Maria ema ida neebe espiritu boot ba Nai Jesus nia misaun, nia potensia boot no talentu barak no hakarak fahe ba ema hotu no iha espiritu hakerek livru sira oin-oin no atividade importante seluk tan.
“Madre Maria da Graça iha espiritu atu dezenvolve misaun Jesus nia iha parte barak, maske nia moras toba hela iha jospital mos hanoin nafatin oinsa eskola Atabae bele lao ba oin, nia iha hela sofrementu nia laran liga hela mangeira iha isin lolon tomak maibe kakutak la hakmatek ba misaun buka dalan oinsa atu pesan dranven sira farda ba eskola, no bainhira sasan sira too mai nia WA ba madre sira sasan sira too ona imi bele ba cek no foti, ida nee mak madre Maria da Graça halo iha ninia moris bainhira iha tempu sofrementu sira,” katak nia.
Madre dehan, madre Maria iha ideia barak atu dezenvolve provincial SSpS iha Timor Leste, no madre ema ida neebe optimista, no dala ruma mos nia servisu too haluha nia aan hodi halo cek up, no nia iha mehi boot ba misaun maibe Maromak foti ona nia husi ema hotu nia leet.
(eme)
