DILI, STLTIMORLESTE.com – Visi Primeiru Ministru, Ministru Koordenadór Asuntu Sosial, Dezenvolvimentu Rural no Habitasaun, Mariano Assanami Sabino no Reprezentante UNICEF iha Timor Leste (TL), Patrizia Digiovanni, ohin asina planu asaun konjunta hodi rezolve ma nutrisaun iha TL.
Nia dehan, kolaborasaun nee atu valida kolaborasaun neebe halao ona entre UNICEF ho departamentu oin-oin iha Visi Primeiru Ministru hanesan Konselhu Nasional ba seguransa ai-haan hanesan Konselhu Nasionál Seguransa Alimentár no Nutrisaun (CONSSAN TL), no Unidade Misaun iha Kombate Stunting (UNMICS).
Visi Primeiru Ministru Mariano Assanami hatoo nia agradesimentu ba UNICEF neebe servisu hamutuk ho Governu iha apoiu ba sistema neebe diak no fasilita programa prioridade sira ba Governu.
“Ohin ita marka momentu pivotal ida iha ita nia luta hasoru ma nutrisaun infantil, asinatura planu asaun konjunta ida nee ho UNICEF laos prosesu formal deit, maibe deklarasaun nasionál ida. Dokumentu ida nee fo impulsu no akuntabilidade ba ita nia esforsu sira,” hatete Visi Primeiru Ministru, Ministru Koordenadór Asuntu Sosial, Dezenvolvimentu Rural no Habitasaun, Mariano Assanami Sabino ba jornalista sira iha Salaun City 8 Manleuana Dili, Sesta nee (09/05/2025).
Nia esplika, ho lideransa UNMICS no CONSSAN TL iha linha oin, laos hadia deit koordenasaun, maibe harii mos sistema governasaun neebe bazeia ba evidénsia sustentável no informadu husi komunidade sira nia lian no nesesidade,” nia deklara.
Nia sublinha, presiza mos kooperasaun entre Ministeriu sira neebe iha ligasaun husi CONSAN TL hanesan MOP, MAP, Ministeriu Saúde, MNEK no seluk tan inklui UNMICS hodi kontribui iha implementasaun ninia programa sira ba prevensaun ma nutrisaun iha TL.
Iha fatin hanesan, Reprezentante UNICEF iha Timor Leste, Patrizia Digiovanni informa, UNICEF iha komitmentu atu halo prevensaun ba má nutrisaun iha Timor Leste no mantein seguransa alimentar, atu nunee labarik hotu iha TL bele asesu ba nutrisaun neebe diak.
“Ohin asina Planu Trabalhu Anuál ho Gabinete Visi Primeiru Ministru reafirma ita nia kompromisu kompartilhadu atu hakotu má nutrisaun iha Timor Leste..UNICEF sente orgulhu hodi apoia UNMICS no CONSSAN TL hodi hadia governasaun nutrisaun, koordenasaun no envolvimentu komunidade, no harii fundasaun ba futuru saudavel ba labarik hotu-hotu iha Timor Leste,” nia informa.
Nune’e Diretór Ezekutivu UNMICS iha Timor Leste, Joel Maria Pereira koalia, aleinde serimonia asinatura nee, iha mos workshop neebe koalia kona-ba sensibilizasaun programa entre Ministériu sira neebe iha relasaun.
“Iha planu estratejiku katak, knaar ema neebe tutela ba kada Ministeriu tenke halao. Tanba nee, kada Ministeriu ligadu tenke foka ba implementasaun planeamentu nee tuir atividade sira neebe iha planeamentu, atu nunee bele prevene má nutrisaun iha TL,” nia hatutan.
Nia afirma, tuir dadus 47% husi labarik sira ho idade tinan 5 no menus stunting, neebe iha impaktu signifikativu ba tempu naruk ba sira nia saude fíziku no mentál, afeta sira nia abilidade kognitiva no produtividade iha sira nia moris tomak.
(jen)
