DILI, STLTIMORLESTE.com – Konklave (Conclave) ka eleisaun ba Papa foun hahu iha ohin loron, Kuarta (7/5/2025) iha Kapela Sistina, Vatikanu.
Eleisaun Papa nee hetan partisipasaun husi Cardeal eleitor 133 neebe sira foti juramentu atu kaer segredu durante prosesu nee.
Durante Konklave, Cardeal sira izoladu atu labele hetan intervensaun husi mundu liur. Wainhira iha Kapela Sistina, Cardeal sira sei halo misa iha oras 10 dader tempu lokal (molok oras 17:00 OTL) molok konklave hahu.
Sira sei simu kartaun votu ho liafuan Eligo in summum pontificem (hau hili Papa).
Kada Cardeal hakerek naran kandidatu neebe sira hili ho maneira atu labele hatene sira nia vota, depois hit sae kartaun nee no lao ba altar nia leten.
Cardeal sira tau kartaun votu iha urna bronze neebe falun ho osan-mutin. Papa neebe eleitu tenke hetan votu 2/3. Karik la hetan numeru nee, votasaun sei halo fali dala rua iha dader no dala rua depois meiudia. Karik depois loron tolu seidauk iha Papa neebe eleitu, bele iha deskansa loron ida ba reza.
Prosesu nee repete depois de votasaun hitu. Depois de votasaun 33, sei iha votasaun foun entre kandidatu rua neebe hetan votu barak liu.
Iha Konklave nee besik 80% Cardeal sira mai husi global south ka nasaun sira neebe sei dezenvolve.
Naran Cardeal sira neebe konsidera sai kandidatu ba Papa foun mos publika ona. Sira mak Card Luis Antonio Tagle husi Filipina, Cardeal Pietro Parolin husi Italia, Cardeal Peter Turkson husi Ghana, no Cardeal Fridolin Ambongo husi Kongo.
Maibe, la taka posibilidade Papa neebe eleitu iha Konklave nee laos husi kandidatu forte neebe sira nia naran nee publika ona.
(Ekipa STL)
