DILI, STLTIMORLESTE.com – Atu konklui lalais investigasaun ba iha kazu roo Haksolok neebe sai preokupasaun sosiedade sira nian, Komisariu KAK tenke halo komunikasuan ho Prokurador, hodi nomeia Prokurador ida halao servisu hamutuk ho investigador KAK sira.
“Komisariu iha komitmentu ida atu halo Komunikasaun intensivu ho Prokurdor atu nomeia Prokurador ida, atu diretamente lidera investigasaun hamutuk ho ekipa investigador sira iha KAK, se lae KAK lori ba Prokurador ida nee sei falta haruka fila fali la iha serteja kazu nee hotu ka lae,” dehan Peskijador Legal JSMP, Luis de Olivera Sampaio ba STL iha nia knaar fatin Kolmera, Dili, Kuarta (23/10/2024).
Nia hatutan, presiza ekipa ida forte, ho kolaborasaun intensivu entre KAK ho Ministeriu Publiku, labele ba iha Ministeriu Publiku soe tiha ba KAK, depois KAK haruka tiha ba, kuandu troka Komisariu hahu foun fali, too autor sira bele fila tiha ba mundu seluk mos kazu nee sei la hetan rezultadu, nunee autor sira hotu la iha kazu nee sai la hotu iha Tribunal.
Durante nee KAK servisu independentemente tuir buat nebee lei dehan, maibe kazu balu tenke servisu entre KAK iha koordenasaun regular ho Prokurador, orienta kedan falta no difisil iha neebe, atu investigasaun feitu ona sira haree deit, verifika apresia haree artigu neebe relevante, sira hahu elabora akuzasaun lori ba Tribunal hodi halo julgamentu, se la iha dudu ba dudu mai la hatene too bainhira mak hotu.
Iha fatin ketak, Jurista Jose Maria Guterres dehan, atu konklui lalais investigasaun, presiza iha servisu koordenasaun entre Ministeriu Publiku no KAK.
“Presiza iha kolaborasaun servisu entre parte rua KAK no Prokurador, atu nunee investigasaun bele lao ho lais, hodi konklui nia investigasaun,” dehan nia.
Antes nee, Komisariu KAK Rui Pereira deklara ona katak, antes nee Komisariu seidauk iha, prosesu roo Haksolok haruka tiha ba iha Ministeriu Publiku, no Ministeriu Publiku delega ba iha PSIK hodi halo investigasaun.
Nunee, ho mandatu neebe iha ona, sei haree halo reuniaun ho Prokurador, atu haree mos kona-ba prosesu sira nee.
(ter)
