DILI, STLTIMORLESTE.com – Jurista Timor oan konsidera katak, atu konklui kazu Roo Haksolok neebe dada atensaun ema hotu nian, Ministeriu Publiku (MP) tenke hatudu nia vontade no seriedade.
Tuir Jurista Sergio Dias Quintas katak, kazu Roo Haksolok neebe too agora seidauk iha konkluzaun husi Ministeriu Publiku, tanba deskonfia involve husi lideransa politiku sira. Tanba nee mak halo kazu nee sai komplexu hodi seidauk determina nia prosesu investigasaun.
“Hau nia hanoin atu konklui kazu ida nee, simplesmente MP mak tenki hatudu nia vontade no seriedade hodi konkluzaun ba kazu ida nee,” dehan Sergio ba STL iha Kaikoli, Segunda (30/03/2026).
Nia hatutan, tuir regra bainhira kazu nee kleur demais nia bele extinge ka mate, labele investiga ka akuza tan, iha norma prosesual penal neebe previstu iha artigu 110, numeru 1 dehan katak, prosedimentu kriminal estinge, tanba preskrisaun kuandu hahu iha momentu neebe ajente pratika.
Nia esplika, tuir norma rerefe bainhira kazu nee tama ona prazu ba preskrisaun sei la prosesa tan ba oin.
Sergio akresenta, ita hotu espera katak, MP bele uza nia kompetensia hodi konklui prosesu nee, duke hein to kazu tama preskrisaun.
Iha sorin seluk, Prokurador Jeral da Republika, Nelson de Carvalho dehan, kazu Roo Haksolok prosesu investigasaun lao hela, no prosesu ida neebe kompleksu.
“Kazu ida nee kompleksidade oituan, neebe investigasaun tenke klean, no iha hela investigasaun nia laran,” dehan PJR.
Nia hatutan, instituisaun sira neebe konjugadu ho Ministeriu Publiku sempre servisu hamutuk hodi haree kona-ba kazu nee.
Aleinde nee, Akademiku UNTL, Sebastiao dos Santos dehan, banhira MP seidauk konklui kazu Ro Haksolok, maka komunidade nia konfiansa ba iha MP sei menus.
“Kazu nee investigasaun lao kleur ona, se MP kontinua seidauk konklui nia prosesu investigasaun maka komunidade sira nia konfiansa ba iha MP sei menus,” dehan nia.
Nunee husu atu MP bele konklui lalais, se MP la esforsu hodi konklui lalais prosesu Ro Haksolok, publiku sei kontinua kestiona no mosu duvidas iha publiku.
(ter)
