DILI, STLTIMORLESTE.com – Konselhu Imprensa realiza dialogu ho media sira, hodi hametin parseria ho media kona-ba Timor Leste nuudar membru Organizasaun Mundial Komersiu (OMK).
“Servisu kooperasaun entre Konselhu Imprensa ho Organizasaun Mundial komersiu (OMK), ita konsentra ba asuntu OMK, Konselhu Imprensa iha programa ida forum editorial, ami halo kada fulan tolu, entaun ami nia ekipa halo kooperasaun diak ho OMK hodi realiza asuntu ida nee,” dehan Prezidente Konselhu Imprensa, Otelio Ote liu husi nia diskursu iha Sentru Konvensaun Dili, Sesta nee (28/03/2025).
Prezidente KI nee hatete, hanesan ema hotu-hotu hatene Konselhu Imprensa independente iha aspetu administrativu finansa sira mak orgaun reguladora ba meus komunikasaun sosial nian.
“Hanesan ita boot sira hatene, Konselhu Imprensa independente iha aspetu administrativu no finansa, ami mak orgaun reguladora ba meus komunikasaun sosial sira liu-liu ba jornalista sira no media sira, ami nia kompetensia ida mak eleva kapasidade teknika intelektual,” nia hatete.
Prezidente nee haktuir, forum ida nee nuudar parte ida husi sira atu eleva kapasidade teknika profisional no intelektual ba jornalista no diretor media sira.
“Forum ida nee nuudar parte ida husi ami nia knaar atu eleva kapasidade teknika profisional no intelektual, hau hanoin jornalista sira no diretor media sira no editor sira konhese organizasaun mundial komersiu, ita boot sira rona tiha ona maibe ita mos tenke konhese ita seidauk intende didiak saida mak OMK,” dehan nia.
Nia afirma, oinsa prosesu ida atu sai membru OMK, bainhira temi organizasaun mundial ka organizasaun internasional ruma pro kontra internal iha nasaun nee rasik.
“Nee oinsa prosesu ida atu bele atinji sai membru OMK bainhira ita temi organizasaun mundial ka organizasaun internasional ruma, pro kontra internal iha ita nia nasaun nee rasik sempre mosu, ita boot sira hatene OMK rasik hasoru dezafius, bainhira nia atu marka prezensa iha Timor Leste, tanba iha nee politika Governu liu-liu Timor Leste tenke realiza duni nia pozisaun atu sai parseiru ida husi OMK, entaun ita lao tuir prosesu ida nee, tuir ita nia knaar koko masimu tebes,” dehan nia.
(EST 4)
