DILI, STLTIMORLESTE.com – Konselhu Ministru aprova projetu Dekretu-Lei neebe aprezenta husi Ministra Saúde, Elia dos Reis Amaral, neebe ho objetivu atu estabelese Rejime ba Promosaun Estraordinaria Pesoal Integradu iha Karreira Profisional Saude sira iha Administrasaun Publika.
“Diploma nee ho objetivu atu reforsa motivasaun no valorizasaun karreira profisionál sira nee nian, hodi kontribui mos ba funsionamentu servisu saúde publika neebe diak liu, ho hatan ba falta prosesu regular sira promosaun nian iha setor nee,” haktuir nota komunikadu imprensa neebe STL asesu husi Media Governu, Kuarta (10/09/2025).
Rejime Promosaun Estraordinariu ida nee abranje mediku, enfermeiru, parteira no tekniku diagnostiku, terapeutiku, no mós saude publika, hodi permite sira atu avansa ba kategoria superiór tuir mai liu husi sistema pontuasaun.
Klasifikasaun nee bazeia ba soma pontus neebe fo bazeia ba kriterius objetivus, hanesan durasaun servisu, avaliasaun dezempenhu, prestasaun servisu iha área remota, formasaun, asiduidade no komportamentu diak.
“Diploma nee prevee mos kriasaun dalan promosaun automatiku ida liu husi rekonhesimentu profisionál ba enfermeiru sira iha kategoria Enfermeiru Baziku, neebe sei avansa ba kategoria Enfermeiru Jeral Junior B hafoin kompleta formasaun espesifika, neebe sei aprova ho despaxu husi membru Governu neebe responsavel ba area saude,” sita komunikadu.
Numeru vaga sira neebe sei prienxe sei fiksa husi Rezolusaun Governu, liu husi proposta Komisaun Funsaun Publika nian.
Jornalista: Alberto Menezes
Editor: Xisto Mendonça
One Response
Diak no apresia