DILI, STLTIMORLESTE.com – Governu liu husi reuniaun Konselhu Ministru aprova ona projetu Dekretu-Lei, neebe aprezenta husi Ministru, Gil da Costa Monteiro “Oan Soru”, hodi fo apoiu finanseiru ba familia martir sira.
Projetu Dekretu-Lei nee objetivu atu fo apoiu finanseiru dala ida deit ba membru familia (inan-aman ka maun-alin) husi martir sira Libertasaun Nasional nian neebe la husik hela erdeirus tuir prevee ona iha n. 1, artigu 27.º husi Estatutu Kombatentes Libertasaun Nasional.
Diploma nee estabelese montante benefisiu nian ho rihun US$ 10.000, atu fo ba inan-aman sira ka, bainhira sira laiha, ba maun-alin sira husi martir sira Libertasaun Nasional nian.
“Objetivu mak atu rekonhese no valoriza sakrifísiu husi sira neebe fo sira nia vida ba independensia Timor Leste, hodi garante justisa sosial ba sira nia membru família besik neebe esklui husi pensaun neebe prevee iha Estatutu Kombatentes nian haktuir nota komunikadu imprensa neebe STL asesu husi Governu, Kuarta (01/10/2025).
Pedidu ba apoiu tenke aprezenta formalmente ba Ministeriu Asuntus Kombatentes Libertasaun Nasional, iha koordenasaun ho Konselhu Kombatentes Libertasaun Nasional, hodi hatama pedidu no dokumentasaun neebe presiza.
Pagamentu sei halo liu husi transferensia bankaria diretamente ba konta benefisiariu nian.
Apoiu finanseiru dala ida deit nee labele tau hamutuk ho pensaun sira seluk neebe atribui tuir Estatutu Kombatentes Libertasaun Nasional, no karik iha benefisiariu liu ida, montante nee sei fahe hanesan.
Jornalista: Alberto Menezes
Editor: Xisto Mendonça
